Գյումրու կենտրոնում գտնվող Սպանդարյան փողոցի մի հատվածը, որտեղ բնակվել է քաղաքի ամենավառ անհատականություններից մեկը՝ Գյումրու պատվավոր քաղաքացի, ՀՀ մշակույթի վաստակավոր գործիչ Հասմիկ Կիրակոսյանն, այսօր պաշտոնապես անվանակոչվեց նրա անունով։
Այսօր Հասմիկ Կիրակոսյանի ծննդյան օրն է, նա կդառնար 80 տարեկան։
Հիշեցնենք, որ հանրային լսում էր տեղի ունեցել, ներկա գյումրեցիները միաբերան ողջունել էին այդ փողոցը նրա անունով անվանափոխելու գաղափարը։ Այնուհետ Գյումրու ավագանին հավանության էր արժանացրել։
Կարդացեք նաև
Այսօր փողոցի ցուցատախտակի հանդիսավոր բացման ժամանակ Գյումրու համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը նշեց․ «Ավագանու որոշումը ֆորմալ վավերացումն էր այն բանի, որը վաղուց ևեթ իրականություն էր և փաստ։ Ես չեմ հիշում որևէ տաքսու վարորդի կամ գյումրեցու, ով այս փողոցի մասին խոսելիս ուրիշ կերպ ասի, քան տիկին Կիրակոսյանի փողոցը։
Անգնահատելի և անուրանալի է տիկին Կիրակոսյանի վաստակը քաղաքի մշակութային կյանքի զարգացման գործում։
Վստահ եմ՝ յուրաքանչյուրն ինձ հետ համաձայն է․ այն, ինչ գրված է այս փաստաթղթի մեջ, ընդամենը փոքրիկ փոխադարձումն է այն ամենի, ինչ մենք ստացել ենք տիկին Կիրակոսյանից, չնչին և նույնիսկ հոգու պարտքի նման փոխհատուցումը»։
Փողոցի ցուցատախտակը բացեցին Գյումրու քաղաքապետ Վարդգես Սամսոնյանն ու նախկին փոխքաղաքապետ Ռուբեն Սանոյանը։ Վարդգես Սամսոնյանն ասաց, որ Հասմիկ Կիրակոսյանն մահից առաջ «օսյաթ» էր արել Գյումրիում իր անունով փողոց ունենալը։
Նունե ԱՐԵՎՇԱՏՅԱՆ
