Հայաստանի կողմից Ադրբեջանի սահմանին 3 անցակետերի տեղադրումը 2020թ. նոյեմբերի 10-ի եռակողմ հայտարարության սեփական պարտավորությունների կատարման իմիտացիա է: Այս մասին հայտարարել է Ադրբեջանի փոխվարչապետ Շահին Մուստաֆաևը:
«Այդ կետերից դուրս եկող ճանապարհները, ռելիեֆով և կլիմայով պայմանավորված, տարվա մեծ մասը պիտանի չեն Նախիջևանի հետ տրանսպորտային հաղորդակցության և առավել ևս միջազգային տարանցիկ փոխադրումների համար, ինչը ապաշրջափակման նպատակներից մեկն է: Միաժամանակ, որպես կանոն, անցակետերը բացվում են կողմերի համաձայնությամբ, հայելային կերպով. Ադրբեջանի հետ այս առումով որևէ համաձայնեցում չի եղել»,- ասել է Մուստաֆաևը:
Նա նաև ասել է, որ տրանսպորտային միջանցքը տրանսպորտային երթուղի է, որն անցնում է մի քանի երկրների տարածքով, որոնք իրականացնում են համաձայնեցված տրանսպորտային, մաքսային և այլ քաղաքականություն՝ նպատակ ունենալով կրճատել ծախսերը և ժամանակը:
Անդրադառնալով հայկական կողմի այն հայտարարությանը, որ «Զանգեզուրի միջանցքը» կասկածի տակ է դնում Հայաստանի ինքնիշխանությունը՝ Մուստաֆաևն ասել է, որ Հայաստանի տարածքում տրանսպորտային հաղորդակցության վերահսկողությունն իրականացնելու է Ռուսաստանի Անվտանգության դաշնային ծառայության սահմանապահ ծառայությունը:
Կարդացեք նաև
«Թե որքանով է այդ փաստը հարվածում Հայաստանի ինքնիշխանությանը, հարցրեք Հայաստանի կառավարությանը»,- ասել է Մուստաֆաևը:
Պատրաստեց Վիկտորյա ԱՆԴՐԵԱՍՅԱՆԸ
