Պեկինի օտար լեզուների համալսարանի և Վ. Բրյուսովի անվան պետական համալսարանի միջև գործող միջբուհական համաձայնագրով չինացի ուսանողները մեկ կիսամյակ կուսանեն ԲՊՀ-ում: Ասիական գիտությունների դպրոցի ապագա հայագետները կուսումնասիրեն բանավոր, գրավոր հայերեն, չինարեն-հայերեն թարգմանություն, հայ գրականության պատմություն և հայագիտական այլ դասընթացներ:
«Մենք ուրախ ենք, որ հնարավորություն ունենք սովորել Բրյուսովի համալսարանում, քանի որ այն լեզուներ ուսումնասիրելու լավագույն համալսարաններից մեկն է»,- ասում է Հուան Ճուօրը: Ջիան Յիհոնի կարծիքով սա մշակույթին ծանոթանալու և ուսանողների միջև բարեկամության կամուրջ կառուցելու շատ լավ հնարավորություն է։
«Մենք շատ կարևորում ենք ներգնա շարժունության ծրագրերը, որոնց թիվը մեր համալսարանում տարեց-տարի աճում է: Դրանք թույլ են տալիս աշխարհի տարբեր համալսարանների ուսանողներին սովորել հայերեն, ծանոթանալ հայկական հարուստ մշակույթին և ավանդույթներին, պատմությանը, նպաստում են երկրների և ժողովուրդների միջև կապի ամրապնդմանը: Մենք ուրախ ենք, որ Վ.Բրյուսովի անվան համալսարանը ոչ միայն շարունակում է մնալ Հայաստանում օտար լեզուների ուսուցման առաջատար համալսարանը, այլև օտարերկրացի շատ ուսանողների համար այն արդեն դարձել է հայերենը սովորելու լավագույն համալսարան, և նրանց թիվը գնալով ավելանում է»,- նշում է ԲՊՀ ռեկտոր Կարինե Հարությունյանը:
Բացի Պեկինի օտար լեզուների համալսարանից Վ.Բրյուսովի անվան պետական համալսարանն այսօր համագործակցում է աշխարհի 30 երկրների շուրջ 120 համալսարանների հետ, այդ թվում՝ Չինաստանի Դալիանի օտար լեզուների համալսարանի, Ֆրանսիայի Սորբոն, Գերմանիայի Հայդելբերգ, Դյուսելդորֆի Հայնրիխ Հայնեի և Հալլե-Վիթենբերգի Մարտին Լյութերի, Բելգիայի Լյուվենի Կաթոլիկ, Իտալիայի Վերոնայի, Ավստրիայի Վիեննիայի և Զալցբուրգի, Բուենոս Այրեսի Ռոսարիոյի, Մոսկվայի պետական լեզվաբանական, Իսպանիայի Վայադոլիդի, Իրանի Ալամեհ Թաբաթաբայի անվան և այլ համալսարանների հետ, և իրականացնում է ուսանողների, դասախոսների և վարչական կազմի ներգնա և արտագնա շարժունության ծրագրեր, համատեղ որակավորման շնորհման ծրագրեր, գիտահետազոտական ծրագրեր, գիտական համաժողովներ, կոնֆերանսներ, հրապարակումներ և այլն:
Կարդացեք նաև
Վ. Բրյուսովի անվ.պետական համալսարան
