Ներքաղաքական ճգնաժամը հաղթահարելու, նախկին-ներկա փակուղուց դուրս գալու նպատակով «Ժողովրդավարական համախմբում» կուսակցությունը այսօր երկրորդ քննարկումն էր կազմակերպել արտախորհրդարանական քաղաքական ուժերի, քաղաքական դերակատարների եւ բոլոր ցանկացողների համար, որոնք ունեն փոխհամաձայնություն՝ ձեւավորված չորս սկզբունքների շուրջ:
«Ժողովրդավարական համախմբում» կուսակցության նախագահ Սուրեն Պետրոսյանը կլոր սեղանին մասնակցող ուժերին եւ անհատներին ներկայացրեց վերոնշյալ չորս սկզբունքները:
- Գործող իշխանությունների հեռացում:
- Նախկին բոլոր իշխանությունների վերարտադրության եւ նրանց հետ համագործակցության բացառում:
- Հակաարեւմտյան կողմնորոշման եւ դրսեւորման բացառում:
- Հակառուսական կողմնորոշման եւ դրսեւորման բացառում:
Սուրեն Պետրոսյանը նշեց, որ հարաբերական այս անդորրը շատերին կարող է հույս ներշնչել, որ գործընթացները գնում են կարգավորման: Սակայն համոզվածություն արտահայտեց, որ հանրության մեջ մեծամասնությունը շատ լավ հասկանում է, որ մենք կանգնած ենք գոյաբանական սպառնալիքների առաջ, որ գործող իշխանությունը պատրաստվում է ստորագրել մի փաստաթուղթ, որը ոչ միայն աղերս չունի Հայաստանի Հանրապետության շահի հետ, այլ հստակ, շատ մեծ հավանականությամբ, լինելու է կործանարար:
Կարդացեք նաև
Այդուհանդերձ, քաղաքական դերակատարների վարքը որեւէ փոփոխության չի ենթարկվել, գործընթացներ չեն գեներացվում, որպեսզի այդ փաստաթղթի ստորագրումը կանխվի: «Կասկածելիորեն տպավորությունն այնպիսին է, որ յուրաքանչյուրը սպասում է, որ փաստաթուղթը ստորագրվի, որից հետո կարող են գեներացվել քաղաքական գործընթացներ, որոնք կարող են տանել իշխանափոխության, ինչը կազմակերպելը կլինի շատ ավելի հեշտ:Եվ այնպիսի տպավորություն է, որ այստեղ դրված է միայն իշխանություն ունենալու խնդիրը եւ ոչ թե պետական շահը»,- ասաց նա եւ հարց հնչեցրեց, թե ինչն է խանգարում, որպեսզի իրենք այս հատվածում կարողանան գեներացնել այդ գործընթացները:
Պարոն Պետրոսյանը քննարկման մասնակիցներին հորդորեց այս անգամ ոչ թե քննարկել անցյալը, անել անպտուղ վերլուծություններ, այլ կազմակերպել հստակ գործողությունների քննարկում, սահմանել հստակ ժամանակահատված եւ ներկայացնել նպատակին հասնելու կոնկրետ տեխնոլոգիաները: Նա նշեց, որ սկիզբ է դրվելու հստակ գործողությունների, որոնք իրենց տրամաբանությամբ տանելու են շատ որոշակի արդյունքի: Սուրեն Պետրոսյանը ներկայացրեց գործընթացը սկսելու եւ հաջողություն արձանագրելու իր պատկերացրած չորս առաջարկներից կազմված տարբերակը՝ գաղափար, մարդ, ռեսուրս, տեխնոլոգիաներ:
Սուրեն Պետրոսյանի համոզմամբ, այս նախաձեռնությունում հաջողության հասնելու համար առավել կարեւոր է ոչ թե քանակը, ինչպես շատերն են մտածում, այլ որակը, թե որքանով է մարդը գիտակցում իր դերը եւ ինչպիսի պատասխանատվություն է պատրաստ ստանձնել:
Քննարկման ժամանակ հնչեցին հարցեր, որոնց տրվեցին պատասխաններ, եղան նաեւ որոշակի առաջարկներ, որոնք քննարկելու համար նախաձեռնության աջակիցները կհավաքվեն ամենամոտ ապագայում, քանի որ ժամանակ այլեւս չկա:
Աշոտ ՀԱԿՈԲՅԱՆ
