«ՀՀ գոյատևման և զարգացման միակ ճանապարհը ազգային պետությունն է»,- «Արարատյան ալյանս» մտքի կենտրոնի համաժողովի եզրափակիչ պլենար նիստի ժամանակ հայտարարեց հայագետ, մշակութաբան Արթուր Արմինը։
Ըստ նրա՝ մեզ պետք է կացութաձևի փոփոխություն։ Նա մանրամասնեց․ «Առնվազն ռազմավարական բացառիկ նշանակության տնտեսական միավորները պետք է ունենան ազգային սեփականություն։ Համաշխարհային փորձն էլ է դա ասում։ Չենք գիտակցում։ Երեսուն տարվա անկախ օլիգարխիկ համակարգը ոչ մի զարգացման չի տանում։ Ի սկզբանե «մատոռը» սխալ է սարքված։ Ուստի այդ դեպքում ոչ մի բան չի աշխատելու»։
Ըստ նրա՝ ազգային պետության ստեղծման համար պետք է ազգայնական իշխանություն, որը վարչական, պետական լծակներն օգտագործում է պետություն կառուցելու համար։ Սակայն, Արթուր Արմինի կարծիքով, մեզանում դա առաջիկայում տեսանելի չէ։ Խոսելով վերջին ընտրությունների արդյունքների մասին՝ նա ասաց․ «Այդ տոկոսներն արդեն խոսում են սպառողական հասարակության հետաքրքրությունների, նպատակների և սկզբունքայնությունից դուրս միայն ատելության և սոցիալական անտագոնիզմի մասին»։
Ստեղծված իրավիճակից ելքի համար նա մի քանի առաջարկ արեց։ Օրինակ՝ ստեղծել հայագիտական հետազոտությունների կենտրոն, որը կզբաղվի հայի ինքնության քարոզով և կրթությամբ։ Ստեղծել հայոց լեզվի և պատմության տեսահոլովակային համացանցային դպրոցներ։ Ըստ նրա՝ ցանկացած գործողություն պետք է դնել «բիզնես ռելսերի» վրա։
Կարդացեք նաև
Տաթև ՀԱՐՈՒԹՅՈՒՆՅԱՆ
