ՀՀ նախկին վարչապետ Խոսրով Հարությունյանը «Հայելի» ակումբում անդրադարձել է Արցախի անվտանգության ապահովման շուրջ Հայաստանի գործող իշխանության հայտարարություններին:
«Ըստ էության կարելի է ասել, որ Հայաստանը պաշտոնապես` թե առաջին դեմքի միջոցով, թե այլոց, որոնք ուղղակի կամ անուղղակի պատասխանատու են արտաքին քաղաքականության եւ անվտանգության համար, հայտարարեց, որ ինքն այլեւս ոչ միայն Արցախի անվտանգության, այլեւ ընդհանրապես Արցախի երաշխավորը չէ: Ես համոզված եմ, որ ժամանակին կսկսեն քննարկել նաեւ Արցախի ֆինանսական աջակցության կրճատման խնդիրը: Ենթադրում եմ` գործը դրան էլ կհասնի: Խնդիրը թողնվում է բացառապես Ադրբեջան-Ռուսաստան-Արցախ ուղղակի բանակցություններին:
Սա նշանակում է` արձանագրել, որ Հայաստանի իշխանության գործունեության կամ անգործության արդյունքում արցախահայությունը բառացիորեն հայտնվել է հայրենազրկման, ցեղասպանական սպառնալիքի տակ: Եվ հուսալ, որ այլ երկրները, ի դեպ, առաջնորդվելով բացառապես իրենց շահերից` կդառնան Արցախին 120 հազարանոց ժողովրդի ճակատագրի երաշխավորը, ողբերգությունից զերծ պահողը, ես այդպիսի պատրանքների չեմ հավատում»,-ասաց պարոն Հարությունյանը:
Անդրադառնալով ադրբեջանական զինուժի` Հայաստանի ինքնիշխան տարածք ներխուժելու եւ ամրապնդվելու խնդրին` նախկին վարչապետն ասաց. «Կարծում եք պատահական է, որ նրանք Ջերմուկի մերձակա բարձունքներում են: Հիմա գնացեք եւ յուրաքանչյուր ջերմուկցու հարցրեք, թե ինքն իրեն հիմա անվտանգ է զգում: Իհարկե, ոչ: Այսօր ադրբեջանցիներն ամրապնդում են իրենց դիրքերը Ջերմուկի բարձունքներում: Եվ վտանգված է ոչ միայն Ջերմուկը, այլեւ Հայաստանը Սյունիքին կապող ամբողջ ճանապարհը:
Կարդացեք նաև
Հաջորդ քայլը` ասեմ, թե ինչն է լինելու: Մեկ, երկու ամիս հետո այդ ճանապարհով երթեւեկող երկու-երեք մեքենաներից մեկի վրա կրակելու են: Այդ ճանապարհը այլեւս կդառնա երթեւեկության, հաղորդակցության համար վտանգավոր: Արդյունքում կամաց-կամաց կապը Սյունիքի հետ կզրոյանա: Ու դրա արդյունքում էլ կլինի Սյունիքի հայաթափումը: Սա է նրանց ուզածը»:
Աշոտ ՀԱԿՈԲՅԱՆ
