«Ազատություն» ռադիոկայանի վրա հարձակման փորձ կատարելու գործով այսօրվա դատական նիստի ժամանակ դատախազը հրապարակեց մեղադրական եզրակացությունները:
Հիշեցնենք, 2020 թվականի նոյեմբերի 10-ի գիշերը, «Ազատություն» ռադիոկայանի վրա հարձակման փորձ կատարելու համար մեղադրանք է առաջադրվել «Երկիր մեդիա» ՀԸ տնօրեն Բագրատ Եսայանին, ՀՅԴ Արարատի Մարզային կոմիտեի ներկայացուցիչ Գերասիմ Վարդանյանին եւ ՀՅԴ-ական Գառնիկ Մելքումյանին:
Առաջադրված մեղադրանքները պաշտպանական կողմը որակում է քաղաքական հետապնդում:
Ապա դատարանն անցավ ապացույցների հետազոտման փուլին: Այսօրվա նիստում դատախազը ներկայացրեց նոյեմբերի 9-10-ի իրադարձությունների ժամանակ ՀՀ կառավարության շենքում վնասված ապրանքների փորձագիտական եզրակացությունը:
Կարդացեք նաև
Ավելի վաղ, պաշտպանական կողմը միջնորդել էր հրապարակել բոլոր ապացույցները: Նպատակը՝ ցույց տալ, որ 2020 թվականի նոյեմբերի 9-10-ի տարբեր իրադարձություններ արհեստականորեն կցվում են այս գործին եւ ըստ այդմ էլ ձեւավորվում է մեղադրանքը:
«Դատարանում ես զարմանք արտահայտեցի՝ ասելով՝ ի՞նչ կապ ունի այս ամենը մեր գործի հետ: Դատախազը պատասխանեց, որ փաստաբաններն են միջնորդել, որպեսզի ապացույցները ամբողջությամբ հրապարակվեն: Իսկ փաստաբանները, պարզ է, թե ինչի համար էին միջնորդել»,-Aravot.am-ի հետ զրույցում ասաց Բագրատ Եսայանը:
Հաջորդ նիստը կկայանա նոյեմբերի 2-ին:
Նելլի ԳՐԻԳՈՐՅԱՆ
