Շիրակի դատախազ Գուրգեն Գրիգորյանը հաղորդում է ներկայացրել գյումրեցի ընդդիմադիր իրավապաշտպան Կարապետ Պողոսյանի դեմ՝ պահանջելով քրեական պատասխանատվության ենթարկել նրան, քանի որ վերջինս սոցցանցերում վիրավորական բնութագիր է տալիս իրեն ու այսպիսով ենթարկում հոգեբանական ճնշման։
Կարապետ Պողոսյանը մեր զրույցում ասաց, որ այս թեմայով իրեն դեռ հարցաքննության չեն հրավիրել, վարույթը քննելու է զինվորական դատախազության քննչական ծառայությունը։
«Ես նման ցածր բարոյահոգեբանական վիճակի մեջ գտնվող պաշտոնյային այլևս չեմ ուզում անդրադառնալ։ Սա ինձ համար բացահայտում էր, որ նա այնքան շատ կարող է կառչած լինել իր աթոռից, որ կարող է այդքան ցածրանալ։ Մտահոգություն ունեմ, որ վաղը մյուս օր հենց պաշտոնից հանեն իրեն, կարող է անգամ ինքնասպանություն գործի, քանի որ թույլ մարդու տպավորություն է թողել»,-ասաց Կարապետ Պողոսյանը։
Վերջինս նաև տեղեկացրեց, որ պաշտոնական գրություն է ստացել ԱԱԾ-ի քննչական դեպարտամենտից, որտեղ քրեական վարույթ է հարուցվել մամուլով իր արած հայտարարությունների հիման վրա՝ ՀՀ Քրեական օրենսգրքի 495 հոդվածի 3-րդ մասի 2-րդ կետով։
Կարդացեք նաև
Այս հոդվածը կոչվում է «Դատավարության մասնակիցների լիազորությունների իրականացումը խոչընդոտելը», 3-րդ կետի 2-րդ մասը նախատեսում է պատիժ՝ 3-6 տարի ժամկետով։
Հիշեցնենք, որ գյումրեցի ընդդիմադիր գործիչը մամուլի ասուլիս էր հրավիրել՝ Գուրգեն Գրիգորյանին մեղադրելով իր նկատմամբ շինծու քրգործեր հարուցելու մեջ։ Կարապետ Պողոսյանը նաև հայտարարել էր, որ իր ֆեյսբուքյան էջում դատախազին քննադատության ենթարկելուց հետո նա քրեական ենթամշակույթ ունեցող անձանց է ուղարկել իր մոտ՝ գործարքներ առաջարկելով։
Նունե ԱՐԵՎՇԱՏՅԱՆ
