«Նիկոլ Փաշինյանը եւ իր ռեժիմն ամեն ինչ անում են, որ երկրորդ լեգիտիմ իրավունքը տան մեր թշնամուն՝ նոր պատերազմական ագրեսիա սկսելու արդեն Հայաստանի դեմ: Ու դա, ես չեմ բացառում, որ պայմանավորված է, ինչպես 44-օրյա պատերազմը»,- «Հայելի» մամուլի ակումբում կայացած ասուլիսում այսօր հայտարարեց ՀՀԿ ԳՄ անդամ, ԱԺ նախկին փոխխոսնակ Էդուարդ Շարմազանովը:
Անդրադառնալով արցախյան հարցի լուծման արեւմտյան եւ ռուսական տարբերակներին, ինչի մասին հրապարակումներ եղան մամուլում եւ ինչը պաշտոնական Երեւանի կողմից չի էլ հերքվել, բանախոսն ասաց, որ առաջարկվող երկու տարբերակներն էլ վատն են ու մենք հիմա պետք է ընտրություն կատարենք վատի եւ վատթարագույնի միջեւ. «Արեւմտյան նախագծով Արցախի թեման փակվում է, Արցախը փաթեթով տրվում է Ադրբեջանին. պրծավ էդ մեր երեսնամյա երազանքը, զոհերը, Շուշին, Հադրութը: Ռուսականով՝ ԼՂՀ կարգավիճակի հարցը թողնում է ապագային. էնտեղ էլի հույս կա: Նիկոլը համ էնտեղ է խոսք տվել, համ՝ էնտեղ ու շատ լավ հասկանում է՝ քցի ռուսին՝ կպատժի ռուսը, քցի Արեւմուտքին՝ կպատժի ՆԱՏՕ-ն, հիմա ի՞նչ անի՝ շատ բարդ է լինելու: Ինքը նման է այն կնոջը, որ նույն ժամին, նույն զագսում, երկու տարբեր տղամարդու հետ պայմանավորվել է: Որպեսզի ինքն այդ պատժից խուսափի, շատ հնարավոր է, որ պայմանավորված պատերազմով այդ միջանցքն էլ տա, Սյունիքի մի մասն էլ տա: Այդտեղ մեր հույսը մնում է Իրանը, որը մեկ անգամ չի, որ ամենաբարձր մակարդակով հայտարարել է՝ թույլ չի տալու սահմանների փոփոխություն եւ ՌԴ-ն, բայց ՌԴ-ի ձեռքերն ու ոտքերը Ուկրաինայում կապված են»:
Էդուարդ Շարմազանովը հիշեցրեց 2016 թվականի հոկտեմբերի 7-ին՝ ապրիլյան պատերազմից ամիսներ հետո, Բաքվում, Ադրբեջանի նախագահ Իլհամ Ալիեւի հայտարարությունն այն մասին, որ «Հայաստանն ունի հզոր հովանավորներ եւ անսահման քանակությամբ զենք», հիշեցրեց նաեւ Ալիեւի այն հայտարարությունը, որ փակ դռների ետեւում իրեն ստիպում են ճանաչել Արցախի անկախությունը, իսկ 44-օրյա պատերազմից հետո արդեն Ալիեւը հայտարարում էր, որ Հայաստանից 4-5 միլիարդ դոլարի զենք է վերցրել ու տարակուսեց ՀՀ գործող իշխանությունների այն հայտարարություններից, որ «նախկինները բանակը թալանել են», իսկ Նիկոլ Փաշինյանն էլ այսօր հայտարարում է, որ զենք չունենք, գումարը տվել են՝ զենք չեն տալիս:
«Ակնհայտ է, որ Նիկոլը տվել է բանավոր խոստումներ եւ նրա տված բանավոր խոստումները հազարապատիկ ավելի վատն են, քան գրավոր փաստաթղթերը»,-վերլուծելով 44-օրյա պատերազմի արդյունքում ստորագրված եռակողմ հայտարարությունն ու հետո տեղի ունեցածը՝ հանձնված հայկական տարածքները, ասաց Էդուարդ Շարմազանովը:
Կարդացեք նաև
Նելլի ԳՐԻԳՈՐՅԱՆ
