SHAMSHYAN.com-ի տեղեկություններով՝ երեկ՝ հոկտեմբերի 16-ին, արտակարգ դեպք է տեղի ունեցել Երևանում։ Ժամը 17։00-ի սահմաններում օտարերկրացի 27-ամյա քաղաքացուհին ոստիկանության Կենտրոնական բաժին է դիմել և հայտնել, որ անհայտ անձը, ներկայանալով, որ ինքը իրավապահ մարմնի աշխատակից է, ներս է մտել Կենտրոն վարչական շրջանում գտնվող իր բնակարան, վերցրել իր անձնագիրը և հայտնել, որ իրեն մարմնավաճառությամբ զբաղվելու կասկածանքով տեղափոխում է ոստիկանություն։
Սակայն տղամարդն աղջկան ոչ թե ոստիկանություն, այլ Մյասնիկյան պողոտայում գործող «Իբիցա» հյուրանոցային համալիր է տարել, որտեղ էլ սպանության սպառնալիքների ազդեցության ներքո մեկ այլ անձի հետ ապօրինի զրկել են այդ աղջկան ազատությունից, մինչև հոկտեմբերի 16-ի 12։30-ն ընկած ժամանակահատված։
Արդեն հյուրանոցային համալիրում առևանգած անձը մի քանի անգամ հարվածել է առևանգվածի դեմքին, ապա նրանից հափշտակել նրա մոտ եղած մոտ 600 հազար դրամը, իսկ մյուս առևանգողը աղջկան ազատ արձակելու պայմանով իր հետ սեռական հարաբերություն է ունեցել։
Ոստիկանության Կենտրոնական բաժնի քրեական հետախուզության բաժանմունքի ծառայողները պարզել են, որ առևանգողը Երևանի բնակիչ 50-ամյա Սամսոն Խ․-ն է, իսկ մյուս անձը Շիրակի մարզի բնակիչ 23-ամյա Գուրգեն Գ․-ն է։
Երեկ՝ ժամը 13։00-ի սահմաններում «Արմենիա» բժշկական կենտրոնից ահազանգ է ստացվել ոստիկանության Կենտրոնական բաժին, որ շտապօգնության բժիշկների 019 խումբը «Իբիցա» հյուրանոցային համալիրից «ալկոհոլային ինտոքսիկացիա» ախտորոշմամբ անգիտակից վիճակում իրենց մոտ են տեղափոխել մի քաղաքացու։
Կենտրոնի ոստիկանները պարզել են, որ այդ քաղաքացին՝ անձին ազատությունից ապօրինի զրկելու և ավազակություն կատարելու հիմնավոր կասկածանքով իրենց կողմից որոնվող Սամսոն Խ․-ն է, ում արդեն ոստիկանները հիվանդանոցում վերցրել են իրենց հսկողության տակ։
Այս պահին ձեռնարկվում են անհրաժեշտ միջոցառումներ Գուրգեն Գ․-ին հայտնաբերելու ուղղությամբ։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
Նյութն ամբողջությամբ՝ սկզբնաղբյուր կայքում:
