Այսպես կոչված «1000 դրամների հիմնադրամը մինչ օրս շահառուներին տրամադրել է 65 մլրդ դրամի չափով հատուցումներ, այս մասին այսօր հայտնեց Զինծառայողների ապահովագրության հիմնադրամի տնօրեն Կարինե Սարգսյանը՝ «Հոդված 3» ակումբում կազմակերպված «44-օրյա պատերազմի մասնակիցների սոցիալական ու առողջապահական խնդիրները» թեմայով քննարկմանը:
Նրա խոսքով, մինչև 44 օրյա պատերազմը հիմնադրամն ունեցել է 416 շահառու, 44-օրյայից հետո շահառուների թիվը հասել է 4454-ի, իսկ ահա 44 օրյա պատերազմին հաջորդած պատերազմական գործողությունների, օրինակ՝ 2022թ. սեպտեմբերի 13-ի մարտերի հետևանքով առաջացած շահառուների տվյալները հիմնադրամը դեռևս չունի, բացառությամբ՝ 14 գործի:
Կարինե Սարգսյանը ներկայացրեց ողջ գործընթացը, որով զինծառայողներն ու ընտանիքները պետք է անցնեն այս հիմնադրամից ֆինանսական աջակցություն ստանալու համար: Նա, կարևորելով զինծառայողներին և նրանց ընտանիքներին սոցիալ-տնտեսական, հոգեբանական օգնության տրամադրումը՝ նշեց, որ հիմնադրամը, ՀՀ աշխատանքի և սոցիալական ապահովության նախարարության հետ, նախաձեռնել է էլեկտրոնային հարթակի ձևավորում, որը կմեկտեղի ու կհամակարգի նմանատիպ օգնություններ տրամադրող բոլոր կազմակերպությունների աշխատանքը:
Խոսելով 2016թ քառօրյա, 2020թ 44 օրյա պատերազմների մասնակիցների, զոհված զինծառայողների ընտանիքների, ինչպես նաև Արցախից տեղահանված ընտանիքներին աշխատանքի տեղավորման պետական աջակցման ծրագրի մասին, ՀՀ աշխատանքի եւ սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը տեղեկացրեց, որ ծրագրի նպատակն է երկուստեք աջակցել թե գործատուներին և թե շահառուներին:
Կարդացեք նաև
«Գործատուն՝ նախքան աշխատանքի ընդունելը, վերապատրաստման կարիքի դեպքում, պետությունն ինքն է 5 ամիս շարունակ հոգում ծախսերը, յուրաքանչյուր ամիս 50 հազար դրամ փոխանցելով տվյալ գործատուին, գործատուն իր հերթին պարտավորություն է վերցնում պետության կողմից վերապատրաստված մեր շահառուի հետ աշխատանքային պայմանագիր կնքել մեկ տարով: Այդ մեկ տարվա ընթացքում պետությունն է վճարում տվյալ աշխատակցի միջին ամսական աշխատավարձի հարկերը, ավելի բարձր աշխատավարձի դեպքում գործատուն միայն այդ տարբերությունն է վճարում»,- նշեց Սարգսյանը:
«Հոդված 3»-ի ներկայացուցիչ Արշալույս Մղդեսյանը տեղեկացրեց, որ 44 օրյա պատերազմի 2-րդ տարելիցին նվիրված հերթական քննարկմանը հրավիրված ՀՀ առողջապահության նախարարության ներկայացուցիչը, ամենատարբեր պատճառաբանություններով չի ներկայացել: Քննարկմանը մասնակցում էին նաև «Զինվորի տուն» վերականգնողական կենտրոնի տնօրեն Հայկուհի Մինասյանը և իրավապաշտպան Ժաննա Ալեքսանյանը։
Լուսինե ՄԱՐԳԱՐՅԱՆ
