Սիսիանի համայնքի ավագանու «Մեկ Հայաստան» եւ «Աշխատանք եւ Արդարություն» խմբակցությունների անդամները տարածել են հայտարարություն, ըստ որի՝ վայր են դնում մանդատները։ «Սիսիան համայնքի հարգելի՛ ընտրողներ, սեպտեմբերի 25-ին տեղի ունեցած ՏԻՄ ընտրությունների արդյունքում միասնական ընդդիմությունը՝ «Աշխատանք եւ արդարություն» դաշինքը եւ «Մեկ Հայաստան» կուսակցությունը ստացավ 7 մանդատ։ Համայնքային իշխանություն ձեւավորելու համար անհրաժեշտ էր 11 մանդատ։ Հոկտեմբերի 12-ին կայացած ավագանու անդրանիկ նիստին մասնակցելով ակնկալում էինք ստանալ ՔՊ-ի հետ համագործակցությունը մերժած ուժերի աջակցությունը։
Չստացանք․․․։ Բացառելով ճնշումների ու խոստումների միջոցով համայնքի ղեկավար ընտրած ուժի հետ որեւէ համագործակցություն՝ վայր ենք դնում մեր մանդատները»,-ասված է հայտարարության մեջ։
Հիշեցնենք, նորընտիր ավագանու առաջին նիստում համայնքի ղեկավար ընտրվեց «Քաղաքացիական պայմանագիր» կուսակցության ընտրացուցակը գլխավորող Արմեն Հակոբջանյանը։ Վերջինիս կողմ էր քվեարկել կառավարող ուժի 8 անդամ եւ «Հանուն Հանրապետության» կուսակցությունից 1 հոգի՝ Նախշուն Յազուլյանը։
Նիստի աշխատանքները բոյկոտել էր եւ չէր մասնակցում «Ապրելու երկիր» կուսակցությունը, որն ավելի ուշ հայտարարեց մանդատները վայր դնելու մասին։
Կարդացեք նաև
Թիվ 34 ընտրատարածքային ընտրական հանձնաժողովի նախագահ Սլավիկ Դադաշյանը Aravot.am-ին տեղեկացրեց, որ ավագանու անդամի ոչ մի թեկնածուից դեռ հանձնաժողովը դիմում չի սռացել։ «Գործող ավագանու անդամները բացարկի դիմումներ ներկայացնում են համայնքապետարան, իսկ թեկնածուները ընտրատարածքային ընտրական հանձնաժողով»,-պարզաբանեց նա։ Սիսիանի համայնքապետարանից էլ ասացին՝ ոչ մի դիմում դեռ չեն ստացել։
Վաղը՝ հոկտեմբերի 15-ին, ժամը 11-ին, Սիսիանի մշակույթի պալատում նախատեսվում է Սիսիանի համայնքի ղեկավար Արմեն Հակոբջանյանի երդման արարողությունը։ Գործող կարգի համաձայն, երդումը կատարվում է ավագանու նիստում, սակայն եթե քվորում չապահովվի, ապա նիստը իրավազոր չէ։
Հիշեցնենք՝ Սիսիանի ավագանին բաղկացած է 21 անդամից․ «Քաղաքացիական պայմանագիր» ՝ 8 մանդատ, «Աշխատանք եւ Արդարություն» դաշինք՝ 5 մանդատ, «Ապրելու երկիր»՝ 4 մանդատ, «Հանուն Հանրապետության» եւ «Մեկ Հայաստան» կուսակցություններին՝ 2-ական մանդատ։ Եթե նիստին չմասնակցեն 21 անդամից 11-ը, ապա երդման արարողությունը չի կայանա։
Արմեն ԴԱՎԹՅԱՆ
