Ազգային ժողովի իշխանական պատգամավորներին, օգնականներին, փորձագետներին պարգեւավճար են նորից բաժանել: Այսօր այս առնչությամբ լրագրողները ԱԺ նախագահ Ալեն Սիմոնյանին հարցրեցին՝ ընդդիմադիր պատգամավորների փորձագետներ ու օգնականներ կան, որոնք գալիս են աշխատանքի, ինչո՞ւ են միայն իշխանականներին դա տվել ու այս պատերազմական ֆոնին պարգեւավճար տալը ճի՞շտ է համարում՝ նա պատասխանեց. «Ընդհանրապես համարում եմ, որ ԱԺ պատգամավորները, որոնք չեն մասնակցում, ընդհանրապես չպետք է ստանան աշխատավարձ, չնայած ընդդիմադիր պատգամավորներն ու իրենց աշխատակիցները ստանում են: Ինչ վերաբերում է օգնականներին, նրանց մեծ մասը նույնպես բացակայում են եւ չեն կարող ստանալ: Ինչ վերաբերում է նրանց, որոնք գալիս են մենք ունենք դեպք, որ դիմել է ընդդիմադիր պատգամավորը, որ իր օգնականն ու աշխատակիցները գալիս են, ես անհատապես կդիտարկեմ: Իսկ պարգեւավճարը սեպտեմբերի 21-ին նվիրված Անկախության օրվա հետ կապված պարգեւավճար է, որը ամեն տարի մշտապես տրվել է: Դա իմ պատասխանատվության տակ է, ես եմ ստորագրել ու ես եմ այդ որոշումը կայացրել»:
Հարցին՝ ավելի արդյունավետ տարբերակներ չկայի՞ն այդ գումարը ծախսելու՝ նա պատասխանեց. «Ավելի արդյունավետ տարբերակները մենք մշտապես օգտագործում ենք՝ Արցախում տուն ենք կառուցում, չունեւոր ընտանիքներին ենք ԱԺ բյուջեից օգնում, օգնություն տրամադրում, բժշկական օգնություն ենք տրամադրում, բայց դրա մասին չեն գրում, որովհետեւ ավելի հետաքրքիր է պարգեւավճարը»:
Հռիփսիմե ՋԵԲԵՋՅԱՆ
