Ռուսաստանի ԱԳՆ-ն պատասխանել է Ֆրանսիայի նախագահ Էմանուել Մակրոնի հայտարարությանը, թե Ռուսաստանն է բախումներ հրահրում Հայաստանի և Ադրբեջանի միջև:
Ռուսաստանի ԱԳՆ տարածած հաղորդագրության մեջ ասվում է.
Մակրոնի հայտարարությունը, թե իբր Ռուսաստանը Լեռնային Ղարաբաղի հակամարտությունն օգտագործում է Հարավային Կովկասում իրավիճակն ապակայունացնելու համար, համարում ենք աղաղակող և բացարձակապես անընդունելի: Նման կերպով վրա տալը համահունչ է Ռուսաստանը դեմոնիզացնելու Արևմուտքի քաղաքականությանը և վկայում է կոնֆրոնտացիոն տրամաբանությունը Ուկրաինայից հետխորհրդային տարածության այլ կետեր, այդ թվում Հարավային Կովկաս տեղափոխելու փորձերի մասին: Ֆրանսիայի նախագահի անհեթեթ հերյուրանքները խոսում են այն մասին, որ Փարիզը շահագրգռված չէ ամուր խաղաղություն հաստատել տարածաշրջանում և հարցականի տակ է դնում իր երկրի՝ այնտեղ կառուցողական դեր խաղալու ունակությունը:
Ի տարբերություն Ֆրանսիայի, որն անգամ Բաքվի ու Երևանի միջև սրացումների շրջանում սահմանափակվում էր խաղաղության ստանդարտ կոչերով, Ռւոսաստանը գործնականում նպաստում է հակամարտության կարգավորմանը: Մեր երկիրը վճռական ներդրում է ունեցել Ադրբեջանի, Հայաստանի և Ռուսաստանի առաջնորդների՝ 2020թ. նոյեմբերի 9-ի եռակողմ հայտարարության ստորագրման գործում, որը վերջ դրեց արյունահեղությանը: Նշված պայմանավորվածությամբ տեղակայված խաղաղապահ զորամիավորումը մնում է տարածաշրջանի անվտանգության երաշխավորը: Խաղաղապահներն արդյունավետ կերպով կանխում են միջադեպերն իրենց պատասխանատվության գոտում, օգնում են կարգավորել խաղաղ կյանքը, տեղ հասցնել մարդասիրական օգնություն, վերականգնել ենթակառուցվածքները: Նրանց աջակցությամբ 53 հազար փախստականներ վերադարձել են իրենց տները, փոխանցվել է ավելի քան 2000 զոհերի մարմիններ, ընդհանուր առմամբ վերադարձվել է 146 պահվող անձ, վնասազերծվել ավելի քան 25 հազար պայթյունավտանգ առարկա:
Կարդացեք նաև
Հենց Ռուսաստանն է գործարկել Բաքվի ու Երևանի միջև հարաբերությունների համալիր կարգավորման աշխատանքը: Ռուսաստանի աջակցությամբ շարունակվում են խաղաղության օրակարգի առաջմղման ակտիվ ջանքերը՝ հիմնված երեք երկրների առաջնորդների՝ 2020թ. նոյեմբերի 9-ի, 2021թ. հունվարի 11-ի և նոյեմբերի 29-ի հայտարարությունների վրա, քայլեր են ձեռնարկվում ապաշրջափակել բոլոր տնտեսական և տրանսպորտային կապերը Հարավային Կովկասում, սահմանազատել հայ-ադրբեջանական սահմանը, կնքել խաղաղության պայմանագիր, երկխոսություն սկսել հանրության և փորձագետների գծով:
Փարիզի փորձերը՝ սեպ խրել Ռուսաստանի հարաբերություններում իր մերձավոր Հայաստանի և Ադրբեջանի հետ, որոնց հետ Ռուսաստանին կապում են բազմամյա և բազմակողմ կապերը, դատապարտված են ձախողման և կհանգեցնեն միայն տարածաշրջանում Ֆրանսիայի հեղինակության հետագա արժեզրկման:
Պատրաստեց Վիկտորյա ԱՆԴՐԵԱՍՅԱՆԸ
