Ցեղասպանության կանխարգելման Լեմկինի ինստիտուտը կոչ է արել հանել 2022թ. մայիսին թողարկված Maroon Berets. 2030 խաղը համապատասխան հարթակներից, քանի որ այն ատելություն և բռնություն է սերմանում հայերի նկատմամբ:
Ինստիտուտի մասնագետները շեշտել են, որ խաղը ծառայում է որպես բռնի քարոզչական նյութ և ուսուցման գործիք թուրք և ադրբեջանցի երիտասարդների համար: Դրանում փառաբանվում են ադրբեջանցի զինվորների դաժան ռազմական հանցագործությունները, որոնց աջակցում են Թուրքիան, թուրք զինվորները և Թուրքիայի կողմից վարձված վարձկանները: Այն նաև օրինականացնում է անցյալ և ապագա ադրբեջանական և թուրքական հարձակումները հայկական տարածքների՝ ոչ միայն Լեռնային Ղարաբաղի վրա, որը հազարավոր տարիներ մեծ մասամբ հայկական է եղել, այլև Հայաստանի ճանաչված ինքնիշխան պետության վրա:
Ինստիտուտի մասնագետները կարծում են, որ խաղը կարող է մեծացնել հետագա լարվածությունը և խրախուսել հայերի և հայկական պետության դեմ հետագա բռնությունները: «Ինչպես վերջերս գրել է առցանց գրախոսներից մեկը. «Պատկերացրեք մի խաղ, որտեղ դուք նացիստ եք և բնաջնջում եք հրեաներին Լեհաստանում և Ուկրաինայում Երկրորդ համաշխարհային պատերազմի ժամանակ: Կամ խաղում եք ռուսների դերում, որոնք 2022թ. ներխուժել և կոտորում են ուկրաինացիներին»: Էթնիկական հիմքով բռնության խրախուսումն անընդունելի է, անկախ հարթակից: Հետևաբար, Steam-ի և Valve-ի պարտականությունն է համապատասխան կերպով գործել և հանել Maroon Berets. 2030-ը և դրա մշակողներին իրենց հարթակից՝ նախքան բռնության հերթական ալիքը»,- ասվում է Լեմկինի ինստիտուտի տարածած հայտարարության մեջ:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
