Զարմացած եմ Բրյուսովի ռեկտորի այն հայտարարությունից, որ իր համար եղել է անակնկալ բուհերի միավորման հարցը, ավելի շատ լիազոր մարմնի համար է դա եղել անակնկալ, որ այդ հարցը ընդգրկել են օրակարգ։ Այս մասին լրագրողների հետ ճեպազրույցում ասաց ԿԳՄՍ նախարար Վահրամ Դումանյանը։
Հիշեցնենք, որ հոկտեմբերի 12-ին տարածվեց նորություն, որ նախատեսվում է միավորել Բրյուսովի անվան համալսարանը Խաչատուր Աբովյանի հայկական պետական մանկավարժական համալսարանի և Ֆիզիկական կուլտուրայի հայկական պետական ինստիտուտի հետ: Բրյուսով անվ. համալսարանի ռեկտոր Կարինե Հարությունյանը հայտարարել էր․«Մենք չենք ցանկանում՝ Բրյուսովի անվան պետական համալսարանը միավորվի որևիցե այլ համալսարանի հետ որևէ սցենարով»:
«Այդ հարցի հետ կապված վերջին քննարկումը եղել է օգոստոսի 9-ին, անձամբ ես եմ հանդիպել 3 բուհերի ռեկտորների հետ, մինչ այդ ևս եղել են հանդիպումներ, նրանց ասվել է, որ կա նման գաղափար, այդ գաղափարը նոր չէ, այն քննարկվել է տարիներ շարունակ, ես ասել եմ, որ հնարավոր է՝ շուտով այդ գաղափարը մտնի գործնական փուլ։ Բրյուսովի ռեկտորը ինձ ասել է, որ իր պաշտոնավարման ժամկետը մոտենում է ավարտին և կարգի համաձայն՝ հոկտեմբերին պետք է հայտարարվի մրցույթ, ես էլ պատասխանեցի, որ քանի որ կա միավորման գաղափար, որքանո՞վ է նպատակահարմար այդ պարագայում մրցույթ իրականացնելը»,- ասաց Դումանյանը։
Բուհերի ռեկտորները առաջարկել են եւ իրենց նպատակն է՝ քննարկել այլ կոնցեպտ, ինչին նախարարը դեմ չի եղել։ Վահրամ Դումանյանի խոսքով, իրենք բաց են և որևէ գաղտնի բան չկա և նախարարություն-բուհ հարաբերություններում՝ նախարարության համար անակնկալ է բուհի նման գործելաոճը: Նա հաստատեց, որ կա բուհերի միավորման նախագիծը, որով բովանդակային առումով ոչինչ չի փոխվի, բայց 3 ռեկտորներից արդյունքում կմնա մեկ ռեկտոր: Նա միաժամանակ ընդգծեց, որ շենքերը կմնան իրենց տեղում և այդ առումով, որևէ փոփոխություն չի լինի:
Կարդացեք նաև
Անդրադառնալով միավորված երեք բուհերի անվան ընտրության հարցին, նախարարը ասաց․«Շրջանառվող նախագծով մենք առաջարկել ենք «Կրթական գիտությունների ինստիտուտ» անվանումը, քննարկելու տեղեր կան, լավագույն տարբերակը կքննարկվի և կընտրվի»։
Լուսինե ՄԱՐԳԱՐՅԱՆ
