Երեկ Գեղարքունիքի մարզի Լևոն Քալանթարի անվան պետական դրամատիկական թատրոնում պրեմիերա էր (թատրոնի տնօրեն Հայկ Ղափանցյան)։ Բեմում Ժիրայր Անանյանի «Բրավո» մեկ գործողությամբ տրագիկոմեդիան էր։ Բեմադրիչն ու երաժշտական ձևավորողը Հովհաննես Օհանյանն է, հագուստի ձևավորողը Ռուզաննա Պողոսյանը, խորեոգրաֆը` Հովհաննես Հասասյանը։ Ներկայացման մեջ զբաղված դերասաններն են Մարտուն Ղևոնդյանը, Սուսաննա Սարգսյանը, Հովհաննես Հասասյանը, Մուշեղ Սիմոնյանը, Հովհաննես Վարդանյանը։
Պատմությունը մի դերասանի մասին է, որը չգնահատվելով պետության և հասարակության կողմից, հայտնվում է անցանկալի իրավիճակում։ Պարտքերի մեջ «թաղված», ընտանիքը կորցրած, կործանված մի դերասան, որն ապրում է բացառապես ազգային արժեքներով։ Բախվելով հասարակության տարբեր շերտերին, ոտնահարվում է նրա մարդ տեսակը։ Պարտքերի համար իր տուն են գալիս թաղային հեղինակությունները և նսեմացնում արվեստագետին, նույնիսկ տանում են ունեցած միակ տաբատը։
Բեմադրող ռեժիսոր Հովհաննես Օհանյանի խոսքով` շեշտը փորձել են դնել այն ազգային արժեքների վրա, որոնք կորցնելով, կորցնում ենք նաև մեր ազգային դիմագիծը։
Հավելենք, որ «Բրավոն» կդառնա Լևոն Քալանթարի անվան պետական դրամատիկական թատրոնի խաղացանկային ներկայացում։
Կարդացեք նաև
Վ. Արզումանյան
