Aravot.am-ի տեղեկություններով՝ Արագածոտնի մարզպետի տեղակալ Էդգար Փարվանյանը իրեն պատկանող և Ապարան քաղաքի վարչական տարածքում գտնվող 1 հեկտար արոտավայրի վրա ապօրինի կառուցել է արևային կայան։
Ապարանի ավտոկայանի տարածքում կատարում է ապօրինի շինարարություն եւ յուրացրել է նախկին «Գորգ-Ֆաբրիկայի» շենքը։
Գայի 3 հասցեի բնակելի շենքի ամբողջ առաջին հարկում արտադրամասեր է հիմնել և խանգարում է բնակիչներին:
Ոստիկանություն ներկայացված հաղորդման հիման վրա կատարված ստուգումներով պարզվել է, որ նշված արևային կայանը կառուցվել է Ապարան քաղաքի վարչական տարածքում գտնվող հողատարածքի վրա, որը 2002թ.-ին 25 տարի ժամկետով վարձակալությամբ տրվել է Ապարան քաղաքի բնակիչ Վրեժ Փարվանյանին։
Կարդացեք նաև
Եվ առանց համապատասխան թույլտվության 2021թ. մարտ ամսին կառուցվել է արևային կայան: Մեր տեղեկություններով՝ Վրեժ Փարվանյանը Արագածոտնի մարզպետի տեղակալի հայրն է:
Պարզվել է նաև, որ Ապարան քաղաքի Բաղրամյան 36 հասցեում գտնվող 960 քմ. տարածքով ավտոկայանի շենքը հանդիսանում է «Հայավտոկայան» ՓԲԸ-ի սեփականությունը, որը վարձակալական հիմունքներով տրվել է «Ապարան Ջուր» ՍՊԸ-ին, իսկ նշված ընկերության տնօրենը հանդիսանում է Ապարան քաղաքի բնակիչ Վահրամ Դավթյանը, որն առանց համապատասխան շինթույլտվության, նշված տարածքում կատարում է շինարարական աշխատանքներ, որոնք 2021թ. դեկտեմբերի 8-ին հայտնաբերվել են Ապարանի համայնքապետարանի աշխատակիցների կողմից, սակայն չեն կասեցվել կատարվող շինարարական աշխատանքները:
Aravot.am-ի հետ զրույցում փոխմարզպետ Էդգար Փարվանյանը մեր թվարկած տեղեկությունները որակեց բամբասանք: Նա հերքեց, թե իրեն պատկանող արոտավայրում արեւային կայան է կառուցվել, այն էլ՝ ապօրինաբար: Ինչ վերաբերում է Վրեժ Փարվանյանին վարձակալության տալու մասին տեղեկությանը, մեր զրուցակիցը հաստատեց, որ վերջինս իր հայրն է, բայց ասաց՝ վերջին 15 տարում նա ապրում է Բեռլինում: Էդգար Փարվանյանն ասաց, որ ոչ ի պաշտոնե, ոչ անձնական հետաքրքրություն չունի, որ նման տեղեկություններ ճշտի, ասաց՝ բարոյականություն չունեցող մարդիկ են նման տեղեկություններ ու բողոքներ տարածողները:
Արփինե ՍԻՄՈՆՅԱՆ
Լուսանկարները՝ Գագիկ ՇԱՄՇՅԱՆԻ
