Մարդու իրավունքների եվրոպական դատարանը որոշում է կայացրել «Աշոտ Մալխասյանն ընդդեմ Հայաստանի» գործով՝ Հայաստանին պարտավորեցնելով վճարել 37500 եվրո՝ որպես ոչ նյութական վնասի փոխհատուցում:
Գործը վերաբերում էր դիմումատուի 22-ամյա որդու մահվանը՝ բանակ զորակոչվելուց հետո: Չնայած առողջական լուրջ խնդիրներին, Մալխասյանը բանակ էր զորակոչվել 2009թ. ամռանը՝ համալսարանն ավարտելուց հետո, այն բանից հետո, երբ որոշվել էր, որ նա պիտանի է պարտադիր զինվորական ծառայության։
2009թ. հուլիսի 5-ին Ա.Մալխասյանին շտապօգնության ավիացիոն փոխադրամիջոցով շտապ տեղափոխել էր Երևանի Կենտրոնական զինվորական հոսպիտալ, որտեղ կոմայի մեջ տեղափոխվել էր վերակենդանացման բաժանմունք։ Նրա մոտ ախտորոշվել էր հետսիրտ-թոքային վերակենդանացման համախտանիշ, ուղեղի այտուց, երկկողմանի ասպիրացիոն թոքաբորբ և ստամոքսաղիքային արյունահոսություն: Նույն օրը նա մահացել էր:
Դատարանը որոշել է, որ իշխանությունները անհիմն կերպով վտանգի են ենթարկել դիմումատուի որդու կյանքը, երբ որոշել է զորակոչել նրան, և որ իշխանությունները չեն կարողացել արդյունավետ քննություն իրականացնել այդ հարցի վերաբերյալ:
Կարդացեք նաև
Ըստ այդմ, ՄԻԵԴ-ը Հայաստանի կառավարությանը պարտավորեցրել է դիմումատուին վճարել
– 35 000 եվրո գումարած ցանկացած հարկ, որը կարող է գանձվել ոչ նյութական վնասի համար.
– 2500 եվրո՝ գումարած ցանկացած հարկ, որը կարող է գանձվել հայտատուից՝ կատարված ծախսերի մասով:
Պատրաստեց Վիկտորյա ԱՆԴՐԵԱՍՅԱՆԸ
