Սեպտեմբերի 27-ին ՀՀ վարչական դատարանը (նախագահող դատավոր՝ Մհեր Պետրոսյան, դատավորներ՝ Արգիշտի Ղազարյան, Անի Հարությունյան) ուսումնասիրեց Կարեն Գրիգորյանի ներկայացուցիչ Հրանտ Վարդանյանի՝ սեպտեմբերի 20-ի դիմումն ընդդեմ ՀՀ կոռուպցիայի կանխարգելման հանձնաժողովի՝ թիվ 106-02-2022 «Բարեվարքության եզրակացության» 6-րդ բաժնի 4-րդ կետում նշված՝ 425.349 եւ 2.380.425 ՀՀ դրամ փաստի փոխարեն նոր փաստ՝ 353.277 եւ 2.308.353 ՀՀ դրամ հաստատելու, նույն բաժնի 3-րդ կետով տրված՝ 2018 թվականի տարեվերջին եւ 2019 թվականի տարեսկզբին հայտարարագրված դրամական միջոցների միջեւ անհամապատասխանություն առկա լինելու փաստի փոխարեն նոր փաստ՝ 2018 թվականի տարեվերջին եւ 2019 թվականի տարեսկզբին հայտարարագրված դրամական միջոցների միջեւ անհամապատասխանություն առկա չլինելու փաստը հաստատելու, 2.545.751 ՀՀ դրամ փաստի փոխարեն նոր փաստ՝ 1.500.000 ՀՀ դրամ հաստատելու պահանջի մասին: Դատարանը վարույթ է ընդունել գործը, քանի որ ըստ որոշման՝ այն համապատասխանում էր ՀՀ վարչական դատավարության օրենսգրքով նախատեսված պահանջներին:
Դատարանը պահանջել է թիվ 106-02-2022 «Բարեվարքության եզրակացության» վերաբերող վարչական վարույթի բոլոր նյութերը Հայաստանի Հանրապետության կոռուպցիայի կանխարգելման հանձնաժողովից, սահմանելով մեկշաբաթյա ժամկետ՝ սույն որոշումը ստանալու պահից:
Գործի քննությունն իրականացվելու է գրավոր ընթացակարգով։
Ռուզան ՄԻՆԱՍՅԱՆ
«Առավոտ» օրաթերթ
07.10.2022
