«Հիբրիդային պատերազմներն օգտագործում են հասարակությունում առկա քաղաքական, տնտեսական, սոցիալական, տեղեկատվական և ենթակառուցվածքային խոցելիությունը: ՀՀ-ի պարագայում միացել է պետական գերատեսչությունների նկատմամբ հանրության վստահության անկումը»,- «Հոդված 3» ակումբում հրավիրված «Հիբրիդային պատերազմ. Տեղեկատվական դիվերսիաների թիրախներն ու դրա դեմ պայքարի քայլերը» թեմայով հանրային բաց քննարկման ժամանակ ասաց Միջազգային հանրապետական ինստիտուտի ծրագրի ղեկավար Աննա Նաղդալյանը:
Նրա դիտարկմամբ՝ ընդհանրապես հայ հասարակությունում այժմ կա պետական քաղաքականության, ինչպես նաև մեդիավստահության անկում: Ըստ Աննա Նաղդալյանի՝ պետք է հասնել նրան, որ կառավարությունն ունենա միասնական վստահելի կերպար և առանձնանա իր պրոֆեսիոնալիզմով. «Անկախ նրանից, թե կառավարության որ պաշտոնյան ինչ հայտարարություն է անում, հանրության ընկալմամբ դա ընդհանրացվում է՝ որպես կառավարության հայտարարություն: Հանրությունը կառավարությանը մեկ ամբողջություն է դիտարկում, և այս օղակներից որևէ մեկի թուլությունը, կառավարությանը խոցելի է դարձնում»:
Աննա Նաղդալյանը փաստեց՝ հիբրիդային պատերազմում կիրառում են պայքարի ոչ ավանդական մեթոդները, ուստի դրա դեմ ուղղված քայլերն էլ պետք է նաև լինեն ոչ ավանդական: Այս հարցում պետությանը պետք է օգնի մասնավոր սեկտորը: Նա հավելեց. «Հիբրիդային հարձակումները համակարգված ու սինքրոնիզացված են: Դրա պատասխանը ևս պետք է այդպիսին լինի: Պետք հստակ մեխանիզմներ մշակվեն, և դրանք չպետք է վերցնել որևէ երկրի մեխանիզմներից և արտատպել, այլ պետք է տեղում աճեցված մեխանիզմներ գրվեն և դրանք պարբերաբար փորձարկվեն»:
Հիբրիդային պատերազմների դեմ պայքարում ըստ Աննա Նաղդալյանի՝ կարևոր է ինֆորմացիոն վակուումը վերացնելը: Այդ վակուումը թույլ է տալիս, որ թատերաբեմ գան անհասկանալի դերակատարներ, որոնց գործունեությունը անգամ ազգային անվտանգության սպառնալիք է դառնում:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ Հայկ ՄԱՆՈՒԿՅԱՆԻ
