Yerkir.am. Նիդերլանդների խորհրդարանում տեղի է ունեցել քննարկում վարչապետ Մարկ Ռյուտտեի մասնակցությամբ, որի ընթացքում մի խումբ պատգամավորներ նրան հարցեր են ուղղել Ադրբեջանի կողմից Հայաստանի դեմ վերջին ագրեսիայի վերաբերյալ:
Ինչպես հայտնում է Հոլանդահայ կազմակերպությունների ֆեդերացիան, քննարկման ժամանակ Նիդերլանդների հայկական համայնքի ներկայացուցիչները լուռ բողոքի ակցիա են անցկացրել խորհրդարանի շենքի մոտ:
Քննարկման ընթացքում Ադրբեջանի ագրեսիայի վերաբերյալ Նիդերլանդների վարչապետին հարցեր են ուղղել պատգամավորներ Կատի Փիրին, Սյորդ Վիմեր Սյորդսման, Մուստաֆա Ամհաուչը, Պիտեր Օմցիգը: Նրանք ուշադրություն են հրավիրել այն փաստի վրա, որ Պրահայում կայանալիք Եվրոպական քաղաքական համայնքի համաժողովին հրավիրված են ինչպես Հայաստանի, այնպես էլ Ադրբեջանի ղեկավարները:
Սյորդ Վիմեր Սյորդսմանը, հիշատակելով Ադրբեջանի հարձակումն ու ռազմական հանցագործությունները, ընդգծել է, որ այդ հարցերը չեն կարող չքննարկվել Պրահայում կայանալիք համաժողովի ընթացքում: Նրա խոսքով՝ հակառակ պարագայում դա կդառնա հարթակ, որտեղ մեծ տեղ է հատկացվում կեղծավորությունը:
Կարդացեք նաև
Պիտեր Օմցիգը հայտարարել է, որ Ադրբեջանը վերջին օրերին հարձակվել է Հայաստանի վրա, ինչի հետևանքով հարյուրավոր մարդիկ են զոհվել, և դա այն իրավիճակում, երբ ԵՄ-ն Ադրբեջանի հետ գազային գործարքի գործընթացի մեջ է: Պատգամավորը հետաքրքրվել է, թե որքանով այս գործընթացները կապ ունեն իրար հետ, և արդյոք դատապարտվե՞լ է Ադրբեջանի հարձակումը:
Պատասխանելով հարցերին՝ վարչապետ Մարկ Ռյուտտեն նշել է, որ բռնությունների դեպքերը ծայրահեղ մտահոգիչ են: Նա ընդգծել է ԵՄ-ի դերը հետագա էսկալացիան կանխելու և բանակցությունները վերսկսելու հարցում: Վարչապետ Ռյուտտեն նշել է, որ անհրաժեշտ է հետաքննել մարդու իրավունքների ենթադրյալ խախտումները և ռազմական հանցագործությունները՝ շեշտելով, որ Նիդերլանդներն աջակցում է չեզոք, անկախ և անխոչընդոտ հետաքննության անցկացմանը: Վարչապետը հավելել է, որ այդ հարցերի և անկախ հետաքննության կարևորության մասին խոսվել է նաև Նիդերլանդներում Ադրբեջանի դեսպանի հետ:
Նյութն ամբողջությամբ՝ սկզբնաղբյուր կայքում:
