«ՀՀ-ի շուրջ իրադրությունը, կարծում եմ, շարունակում է մնալ բավականին լարված՝ կայուն լարված։ Բայց պիտի ասեմ նաեւ, որ ՊՆ հաղորդագրություններից նկատելի է՝ լարվածության թուլացման որոշակի հնարավորություններ կան»,- կառավարություն-ԱԺ հարցուպատասխանի ժամանակ այսօր հայտարարեց վարչապետ Նիկոլ Փաշինյանը։
«Բայց ընդգծեմ, որ հնարավորություն տեսնում ենք նաեւ բանակցային գործընթացի բովանդակությունից ելնելով։ Վերջին տասը օրում տեղի են ունեցել մի շարք հանդիպումներ՝ Միրզոյան-Բլինքեն-Բայրամով, ԱՄՆ նախագահի անվտանգության գծով խորհրդական-ՀՀ անվտանգության խորհրդի քարտուղար-Ադրբեջանի նախագահի օգնական․․․Իհարկե, պարզ է, որ այդ խոսակցությունները պարզ եւ հեշտ չեն, բայց իմ գնահատմամբ՝ վերջին շրջանի քննարկումներն ու դիվանագիտական աշխատանքը մեր համար առաջ գնալու որոշակի տարածք է ստեղծել ու բացել»,-հավելեց նա։
Փաշինյանը նշեց, թե որ ուղղություններով կարող են տարածքներ ի հայտ գալ՝ առաջ շարժվելու համար․ «Ես խոսել եմ 91թ․ դեկտեմբերի ութի համաձայնագրի հիման վրա ՀՀ-ի եւ Ադրբեջանի կողմից փոխադարձ տարածքային ամբողջականությունը ճանաչելու կոնցեպտի մասին։ Կան նախանշաններ, որ այս հենքը եւ մոտեցումը կարող են փոխադարձաբար ընդունելի լինել կողմերի համար։ Կարծում եմ, որ կա որոշակի տարածք, որպեսզի տեղի ունենա եւ մեկնարկի խոսակցություն՝ ԼՂ-ի եւ Ադրբեջանի միջեւ։ Այս երկու ուղղությունները համարում եմ անկյունաքարային»։
Նիկոլ Փաշինյանի խոսքով՝ այս փուլում բավարարված են միջազգային արձագանքով՝ կապված սեպտեմբերի տասներեքի իրադարձությունների հետ․ «Պարզ է, որ որ միջազգային հանրությունը հասցեական գնահատական եւ ճանապարհային քարտեզի պատկերացում է տալիս, թե խնդիրն ինչպես պետք է լուծենք»։
Կարդացեք նաև
Լուիզա ՍՈՒՔԻԱՍՅԱՆ
