ՀՀ Գլխավոր շտաբի պետ Էդվարդ Ասրյանի՝ Կոռուպցիայի կանխարգելման հանձնաժողով ներկայացրած տարեկան հայտարարագրից տեղեկանում ենք, որ նրա կինն ու երկու անչափահաս երեխաները ՌԴ քաղաքացիներ են։
2022 թվականի հայտարարագրում երեխաների ՌԴ քաղաքացիության մասին Ասրյանը չի նշել, նշված է եղել նախորդ տարիների հայտարարագրերում:
Կարեն Վրթանեսյան
Ռազմական փորձագետ Կարեն Վրթանեսյանի համոզմամբ, բարձրաստիճան պաշտոնյայի անաչառ գործունեության վրա այդ հանգամանքը կարող է ազդել:
«Վստահ եմ, որ շահերի բախումը կարող է լինել: Սա կարող է լինել որոշակի լծակ այլ երկրի կողմից որոշումների կայացման վրա ազդելու: Ոչ այսքան բարձրաստիճան պաշտոնյայի դեպքում գուցե դա ընդհանրապես կարեւոր չէ, բայց այս դեպքում… Մի օրինակ բերեմ, ԱՄՆ-ում անցած տարի ընտրում էին ԱՄՆ Դաշնային պահուստների համակարգի հետ կապ ունեցող պաշտոնյայի, որն ընդամենը ծնվել ու մեծացել էր Խորհրդային միությունում, բայց դեռ 90-ականների սկզբին արտագաղթել էր ԱՄՆ, այնտեղ դարձել հայտնի մասնագետ: Ըստ էության՝ նրա ընտրությունը տապալեցին, ինչ է թե՝ Խորհրդային միությունում է ծնվել ու կարող է Ռուսաստանն ինչ-ինչ ազդեցություն իր վրա ունենալ: Լրիվ տեսական, ոչ մի ապացուցված փաստ չկար: Ինքը վաղուց ԱՄՆ քաղաքացի էր, իր կարիերան կայացել էր ԱՄՆ-ում, բայց միայն Խորհրդային միությունում մեծացած լինելու համար նրա ընտրությունը տապալվեց, որովհետեւ համարեցին անվտանգության խնդիր: Այնպես որ շահերի բախում հնարավոր է, նույնիսկ եթե այս պահին չկա, ինչ-որ պահի շահերի բախում կարող է լինել »,-նկատեց փորձագետը:
Կարդացեք նաև
Արփինե ՍԻՄՈՆՅԱՆ
