Երեւան քաղաքի առաջին ատյանի ընդհանուր իրավասության դատարանը (դատավոր՝ Արման Հովհաննիսյան) մեղավորությունն ապացուցված չլինելու հիմքով անմեղ է ճանաչել եւ արդարացրել է տեւական քայքայումով առողջությանը միջին ծանրության վնաս հասցնելու մեջ մեղադրվող Գուրգեն Գրիգորյանին: Դատավճռի հրապարակման օրը դատարանը վերացրել է նաեւ Գուրգեն Գրիգորյանի նկատմամբ որպես խափանման միջոց ընտված չհեռանալու մասին ստորագրությունը:
Նշեմ, որ գործը դատարանում ստացվել էր անցյալ տարվա ապրիլի 1-ին:
Ըստ մեղադրանքի՝ Գուրգեն Գրիգորյանը 2019թ. մայիսի 1-ին, ժամը 03-ի սահմաններում, Երեւանի Շ. Շահամիրյան շենքերից մեկի հետնամասում ժամեր առաջ եղբոր՝ Գեւորգ Գրիգորյանի հետ վիճաբանելու հարցի շուրջ Հովհաննես Մարգարյանից պարզաբանումներ ստանալու կապակցությամբ հանդիպել է վերջինիս հետ, որի ժամանակ եղբոր՝ Գեւորգի հետ միմյանց գործողությունները փոխլրացնելով, ուրիշի առողջությանը մարմնական վնասվածքներ հասցնելու դիտավորությամբ, հարվածներ են հասցրել տուժող ճանաչված Մարգարյանի մարմնի տարբեր մասերին, վերջինիս պատճառելով՝ քթի շրջանի սալջարդ վերքի՝ ներթափանցումով քթի խոռոչ, քթոսկրերի բաց կոտրվածքի, ձախ դաստակի 2-րդ մատի կտրված վերքի՝ խորանիստ ծալիչ ջլի վնասմամբ, երկու կողմից վերին եւ ստորին կոպերի, կրծքավանդակի ձախ կեսի հետին մակերեսի եւ գոտկային շրջանների, աջ արմնկահոդի, նախաբազուկ-դաստակային հոդի, ձախ բազկի եւ նախաբազկի շրջանների արյունազեղումների, աջ ուսագոտու, արմնկահոդի, ձախ բազկի եւ ձախ ծնկահոդի շրջանների քերծվածքների, աջ դաստակի նավակաձեւ ոսկրի կոտրվածքի ձեւերով առողջությանը միջին ծանրության վնաս՝ առողջության տեւական քայքայումով: Գուրգեն Գրիգորյանին մեղադրանք էր առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով, ընտրվել խափանման միջոց՝ ստորագրություն չհեռանալու մասին:
Ռուզան ՄԻՆԱՍՅԱՆ
Կարդացեք նաև
«Առավոտ» օրաթերթ
04.10.2022
