ԱՄՆ-ի Լոս Անջելես քաղաքում կազմակերպվել է հատուկ միջոցառում` հայ համայնքի մի շարք կառույցներին ու անհատներին Իրավունքի և արդարության կենտրոն «Թաթոյան» նորաստեղծ հիմնադրամի գործունեությունը ներկայացնելու համար։
Հանդիպման սկզբում հիմնադրամի տնօրեն Արման Թաթոյանը նշել է, որ իրենց հիմնական գործառույթներից է ադրբեջանական հանցանքների ապացույցներ ամրագրելը, հետազոտելը, մեղավորներին քրեական պատասխանատվության ենթարկելուն նպաստելը:
Դրանից բացի, հիմնադրամի գործունեության ուղղություններն են լինելու.
Կարդացեք նաև
- Հայաստանում ժողովրդավարության և իրավունքի գերակայության ամրապնդումը,
- մարդու իրավունքների և սոցիալական արդարության, ազգային անվտանգության ապահովումը,
- գիտակրթական և հետազոտական գործունեությունը, հանրային իրազեկումների միջոցով հասարակությունում գիտելիքների մակարդակի բարձրացումը,
- հասարակությունում փոխադարձ հարգանքի, բազմակարծության և հանրային համերաշխության ապահովումը,
- Հայաստանի, Արցախի և Հայկական սփյուռքի միջև կապերի, համահայկական համերաշխության ապահովումը և ազգային արժեքների պաշտպանությունը:
Արման Թաթոյանը նշել է, որ գործարկման փուլում է www.tatoyanfoundation.org կայքը, որի միջոցով հնարավոր է նվիրատվություններով աջակցել հիմնադրամի ծրագրերի իրականացմանը։
Նա ևս մեկ անգամ ընդգծել է, որ հիմնադրամի հետ կապված իրականացնելու է ակտիվ հանրային գործունեություն։ Հիմնադրամը չունի որևէ օլիգարխից ֆինանսավորում․ ֆինանսական աջակիցներն են մեր անհատ հայրենակիցները:
Արման Թաթոյանը տեղեկացրել է, որ հիմնադրամում աշխատակիցները Մարդու իրավունքների պաշտպանի աշխատակազմի նախկին աշխատակիցներն են․ պրոֆեսիոնալներ են և ունեն ճգնաժամային իրավիճակներում աշխատելու մեծ փորձառություն։
Հանդիպմանը մասնակցել են Լոս Անջելեսի, Չիկագոյի և մի շարք այլ քաղաքների հայկական կառույցների ղեկավարներ ու անհատներ` հայտնի փաստաբաններ, լրագրողներ, պատմաբաններ, արվեստագետներ և այլն:
Հ․Գ․ Արման Թաթոյանն ԱՄՆ-ում գտնվում է գործնական այցով, որի շրջանակներում տեղի են ունեցել բարձրաստիճան հանդիպումներ, քննարկվել են նոր ծրագրեր ու նախաձեռնություններ:
Իրավունքի և արդարության կենտրոն «Թաթոյան» հիմնադրամ
