Աշխատանքային քննարկում «Անկանխիկ գործառնությունների մասին» ՀՀ օրենքի կիրարկման վերաբերյալ
2022 թ. հուլիսի 1-ից ՀՀ-ում ուժի մեջ է մտել «Անկանխիկ գործառնությունների մասին» օրենքը, ըստ որի` 300 հազար դրամը գերազանցող գործարքները պետք է իրականացվեն անկանխիկ եղանակով: Կիրարկման ընթացքում ի հայտ են եկել մի շարք խնդիրներ, որոնց վերաբերյալ ԱԺ տնտեսական հարցերի մշտական հանձնաժողովը ստացել է բազմաթիվ բողոքներ, առաջարկություններ, դիտարկումներ: Այս մասին ասել է հանձնաժողովի նախագահի տեղակալ Բաբկեն Թունյանը սեպտեմբերի 30-ին տեղի ունեցած աշխատանքային քննարկման ժամանակ:
Աշխատանքային քննարկմանը մասնակցել են պետական կառույցների, գերատեսչությունների, բանկային ոլորտի, ԿԲ-ի ներկայացուցիչներ, տնտեսավարողներ, փորձագետ-իրավաբաններ, տնտեսագետներ: Քննարկման նպատակն է վեր հանել առաջացած խնդիրները եւ անհրաժեշտ լուծումներ տալ դրանց:
Անկանխիկ վճարումների ներդրման մշակույթը, ըստ բանկային համակարգի ներկայացուցիչների, քաղաքակրթական, ռազմավարական հարց է, եւ հասարակությունը պետք է այդ ուղղությամբ առաջ ընթանա:
Կարդացեք նաև
Քննարկման ընթացքում ներկայացվել են բժշկական ծառայությունների մասով առաջացած խնդիրները: Ընդգծվել են, մասնավորապես, օրենքի տեխնիկապես ապահովվածության, հարկային իրավակարգավորումների հստակեցման անհրաժեշտության հարցերը:
Ըստ ոլորտի ներկայացուցիչների՝ բանկերի կողմից գանձվող միջնորդավճարները հավելյալ հարկային պարտավորություններ են առաջացրել տնտեսավարողների մոտ: Ներկայացվել են նաեւ հարկային հարաբերություններին առնչվող եւ պարզաբանում պահանջող՝ մանրածախ առեւտրի ոլորտի իրավակարգավորումներին վերաբերող հարցեր:
Քննարկման ընթացքում նշվել է, որ գյուղական համայնքներում առկա է իրազեկման անհրաժեշտություն, ինչպես նաեւ տնտեսավարող սուբյեկտների համար բանկային ծառայությունների մատչելիության եւ հասանելիության ապահովման խնդիր:
ՀՀ ԿԲ նախագահի տեղակալ Հովհաննես Խաչատրյանը տեղեկացրել է, որ որոշակի փոփոխությունների անհրաժեշտություն կա:
Համատեղ քննարկումները կլինեն շարունակական. կամփոփվեն հավաքագրված խնդիրները, կներկայացվի օրենսդրական փոփոխությունների փաթեթ:
ՀՀ Ազգային ժողով
