Այսօր ԱԺ պետաիրավական հարցերի հանձնաժողովի նիստում արդարադատության փոխնախարար Արփինե Սարգսյանը ներկայացրեց «Արդարադատության ակադեմիայի մասին» օրենքում փոփոխություններ եւ լրացումներ կատարելու մասին նախագիծը, որով առաջարկում է ընդլայնել ակադեմիայի կառավարման խորհրդի կազմը:
Արփինե Սարգսյան
Չնայած ակադեմիան ընդունում է շահառուներ թե՛ Քննչական կոմիտեից, թե՛ Հակակոռուպցիոն կոմիտեից, թե՛ դատախազությունից, կառավարման խորհրդի կազմում մասնակցություն ունեն դատախազական բլոկը՝ 3 դատախազի կազմով եւ դատավորի բլոկը՝ 3 դատավորով, ինչպես նաեւ նախարարության ներկայացուցիչը: Քննչական մարմինների ներկայացուցիչները չկան, թեեւ հանդիսանում են Արդարադատության ակադեմիայի շահառու եւ վերապատրաստում են անցնում: Խորհրդի կազմը 7-ից դառնալու է 13:
Նախագծով առաջարկվում է հավասար պայմաններ ապահովել դատավորներ, դատախազներ, քննիչներ պատրաստող եւ վերապատրաստող կառույցի կառավարման խորհրդի կազմը ձեւավորելիս՝ նախատեսելով յուրաքանչյուր կառույցից երեք ներկայացուցիչ՝ արդարադատության նախարարության ներկայացուցչին թողնելով անփոփոխ: Այսինքն, կլինի 3 դատախազ, 3 դատավոր, ՔԿ 3 ներկայացուցիչ եւ Հակակոռուպցիոն կոմիտեի 3 ներկայացուցիչ: Արդարադատության նախարարության ներկայացուցիչների թիվը չի կարող ավելանալ, դա լինելու է նախարարը կամ նախարարի որոշմամբ իր տեղակալը: Ընդ որում,Հակակոռուպցիոն կոմիտեի եւ ՔԿ-ի նախագահները եւս կարող են հրավիրել խորհրդի նիստեր:
Հռիփսիմե ՋԵԲԵՋՅԱՆ
