Դեռ տարին չի ավարտվել, եւ մեր ձեռքի տակ չունենք ամփոփիչ տվյալներ արդարացումների վերաբերյալ, բայց տեսանելի շատացել են արդարացումները մեր դատարաններում: Այդ մասին բարձրաձայնում են նաեւ փաստաբանները սոցիալական ցանցերի իրենց էջերում: Կան փաստաբաններ, որոնք արդեն իրենց հինգերորդ պաշտպանյալի արդարացման մասին են տեղեկացնում, իսկ դա խոսուն թիվ է:
Ավարտվեց մի գործ, որ դատարանում էր 2019 թվականից: Երեւան քաղաքի առաջին ատյանի ընդհանուր իրավասության դատարանի դատավոր Արման Հովհաննիսյանի (լուսանկարում) դատավճռով Սուղյանն արդարացվել է հանցակազմի բացակայության հիմքով:
Ըստ մեղադրանքի՝ Սեւակ Սուղյանը 2019 թվականի օգոստոսի 14-ին կատարել է ուրիշի գույքի առանձնապես խոշոր չափերի՝ 10.000.000 ՀՀ դրամ գումարի խարդախության փորձ, ինչն ավարտին չի հասցվել նրա կամքից անկախ հանգամանքներով:
Սուղյանին առաջադրված մեղադրանքի համաձայն՝ նախնական դիտավորությամբ նա իրականությունը խեղաթյուրելու եղանակով, ընկերոջ ավտոմեքենայով վթարի իմիտացիա՝ ձեւացում էր կազմակերպել, ապա «Սիլ Ինշուրանս» ապահովագրական ընկերությանը պատճառված վնասի հատուցման վերաբերյալ հայցադիմում ներկայացրել: Սակայն ընկերությունը որոշում է կայացրել ապահովագրական հատուցումը մերժելու մասին:
Կարդացեք նաև
Այնուհետեւ Ֆինանսական համակարգի հաշտարարին է ներկայացվել պահանջ-դիմում՝ ընդհանուրը 10.000.000 ՀՀ դրամ գումարի չափով ապահովագրական հատուցում իրականացնելու մասին, որը նույնպես մերժվել է, քանի որ վարորդի կողմից ներկայացված տվյալները չեն համապատասխանել տվյալ պատահարի առաջացման իրական մեխանիզմին:
Այսինքն, Սուղյանին մեղադրանք էր առաջադրվել ՀՀ քրեական նախկին օրենսգրքի 34-178-րդ հոդվածի 3-րդ մասի 1-ին կետով: Առանձնապես խոշոր չափերի խարդախության փորձ կատարելու մեջ մեղադրվող Սեւակ Սուղյանն արդարացվել է:
Ռուզան ՄԻՆԱՍՅԱՆ
«Առավոտ» օրաթերթ
23.09.2022
