«Ես էլ եմ մամուլից տեղեկացել այդ մասին։ Ամենայն հարգանքով մամուլի հանդեպ, բայց դիրքորոշում չհայտնեմ, քանի դեռ պաշտոնական որեւէ բան չկա»,-լրագրողների հետ ճեպազրույցում այսօր ասաց Երեւանի ընդհանուր իրավասության դատարանի դատավոր Արթուր Ստեփանյանը՝ արձագանքելով մամուլում շրջանառվող տեղեկություններին, թե ԲԴԽ նախագահի պաշտոնին հավակնում է արդարադատության գործող նախարար Կարեն Անդրեասյանը։
Երեւանի ընդհանուր իրավասության դատարանի դատավոր Վարդան Գրիգորյանից էլ հետաքրքրվեցինք՝ մտահոգիչ չէ՞, որ կառավարության թիմի անդամի անունն է շրջանառվում այդ պաշտոնի համար։ «Ոչ, որովհետեւ նա ունի նաեւ այլ անցյալ։ Որքանով տեղյակ եմ՝ փաստաբան, մարդու իրավունքների պաշտպան»,-պատասխանեց Վարդան Գրիգորյանը։
Կարդացեք նաև
Երեւանի ընդհանուր իրավասության դատարանի դատավոր Արման Հովհաննիսյանն (լուսանկարում) էլ նշեց, որ ինքը եւս մամուլից է տեղեկացել, որ Կարեն Անդրեասյանի անունն է շրջանառվում․ «Չէ, ի՞նչ դիրքորոշում ունենամ։ Եթե մամուլի հրապարակումներն այդ մասին հավաստի են, ապա պետք է ճշտել, թե ինչ տրամադրվածություն ունի պարոն Անդրեասյանը։ Եթե նախկին տրամադրվածությամբ է գալու, ապա այո, ես այդ փաստին լավ չեմ նայի։ Իսկ եթե գալու է իրականում արդյունավետ աշխատանք իրականացնելու, ապա որեւէ վերապահում չունեմ»։
Լուիզա ՍՈՒՔԻԱՍՅԱՆ
