Այսօր «Մեդիա կենտրոնում» ադրբեջանագետ Տաթեւիկ Հայրապետյանն անդրադարձավ սեպտեմբերի 22-ին Ն․Ս․Օ․Տ․Տ․ Գարեգին Երկրորդ Ամենայն Հայոց Կաթողիկոսի հրավերով ՀՀ երեք նախագահների՝ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի և Լեռնային Ղարաբաղի Հանրապետության նախագահներ Արկադի Ղուկասյանի և Բակո Սահակյանի հանդիպմանը: Նա ասաց, որ այդ փաստը ինքնին կարեւոր է եւ այս իրավիճակում դժվար է առաջնորդվել պիտակավորմամբ. «Ես չգիտեմ նրանց զրույցի բովանդակությունը, չգիտեմ ինչ որոշման են եկել, կամ եկել են, թե չեն եկել, բայց ես հիշում եմ, որ 2021-ին առաջին նախագահ Լեւոն Տեր-Պետրոսյանը առաջարկում էր միասնաբար հանդես գալ, որ ոչ մեկը առաջին դեմքով հանդես չգա ու թույլ չտային Նիկոլ Փաշինյանի վերընտրումը:
Դա ընդունվել էր Սերժ Սարգսյանի կողմից, չէր ընդունվել Ռոբերտ Քոչարյանի կողմից: Թե ինչպես են իրենք պատրաստվում առաջնորդվել, չեմ կարող ասել, բայց եթե հաշվի առնենք նրանց մեջ ինչքան տարակարծություններ, դիրքորոշումների տարբերություններ կան ու եթե կարողացել են ինչ-որ հայտարարի գալ, սեղանի շուրջ նստել, փորձել լուծումներ գտնել, եթե կարողացել են գտնել, թող ավելի լայն հանրությանը ներկայացնեն, ոչ թե առաջնորդվենք ինչ-որ բամբասանքներով»:
Հռիփսիմե ՋԵԲԵՋՅԱՆ
