«Ի պաշտպանություն Արցախի հասարակական նախաձեռնություն»-ը սեպտեմբերի 20-ին իր հերթական նիստում քննարկեց «Հանրային մշտական գործող կոմիտե» ստեղծելու անհրաժեշտությունը: Նախաձեռնության անդամներն ընդգծել են, որ Հայաստանում կառավարման համակարգային խորացող ճգնաժամի պայմաններում նման հանրային մարմին ստեղծելը ժամանակի հրամայականն է, ուստի հարկ է անհապաղ ձեռնամուխ լինել դրա կազմավորմանը:
Հանրային կոմիտեն հետամուտ է լինելու ՀՀ գործադիր իշխանության և նրա ղեկավարի հրաժարականին՝ բոլոր հնարավոր օրինական գործողություններով: Կոմիտեն համախմբելու է ազգային պետականության պաշտպանության գաղափարին անվերապահ նվիրված հասարակական-քաղաքական ուժերին, որոնք միասին ի զորու կլինեն իրականացնել ժամանակավոր նոր կառավարության ձևավորումը՝ ազգային համաձայնության արդյունավետ սկզբունքների համաձայն:
Նոր կառավարության առաջնային խնդիրը կլինեն Հայաստանի և Արցախի Հանրապետությունների անվտանգության համակարգերի վերականգնումն ու արդիականացումը, Սփյուռքի ընտրանուն ազգային խնդիրների լուծման ներգրավումը, ներքին և արտաքին քաղաքական նոր ուղեգծերի հստակեցումը:
Մենք բաց ենք առաջարկների և համատեղ քննարկումների համար։ Մեր սկզբունքն է՝ «Միասին»։
Կարդացեք նաև
«Ի պաշտպանություն Արցախի» հասարակական նախաձեռնություն
