«Եկեք նայենք, թե ինչ աշխարհագրություն ունենք։ Գտնվում ենք արեւմուտքի եւ արեւելքի հատման կետում, բայց ավելի շատ հավաքական անվտանգության տարածաշրջանին ենք մոտ։ Էլ չասեմ, որ որպես հետխորհրդային երկիր` ինտեգրված ենք եղել։ Տարիներ ի վեր ՀՀ-ն լուրջ աշխատանք է արել այդ ռազմաքաղաքական կառույցի ռազմական բաղադրիչի զարգացման համար։ Երեք ուղղություններով մենք օրինակելի ենք եղել՝ օպերատիվ արձագանքման հավաքական ուժերի ձեւավորում, խաղաղապահ ուժերի ձեւավորում, ՀԱՊԿ ռազմական կոմիտե»,-Եռաբլուրում լրագրողների հետ զրույցում այսօր անդրադառնալով իշխանության ներկայացուցիչների եւ հանրության որոշ հատվածների՝ ՀԱՊԿ-ի հասցեին Ադրբեջանի հարձակման առիթով հնչող քննադատություններին՝ ասաց «Հայաստան» խմբակցության պատգամավոր, ՀՀ պաշտպանության նախկին նախարար Սեյրան Օհանյանը։
«ՀԱՊԿ-ում մեր առաջարկով է ստեղծվել ռազմական կոմիտեն, որում երկրների ԳՇ պետերը հարթակ են ստացել՝ իրավիճակը գնահատելու համար։ Այսինքն, երբ մենք ենք եղել իշխանության, լուրջ աշխատանք է տարվել։ Խոսելով ներկայի մասին։ Ամեն կառույց ունի առաջատար կողմեր եւ թերություններ։ Նույն թերություններն էլ ունի ՆԱՏՕ-ն, դրանում էլ կան երկրներ, որոնք հակամարտում են։ Օրինակ՝ Թուրքիան եւ Հունաստանը։ Եթե ՀԱՊԿ որոշումների ընդունման ընթացակարգերում կան որոշակի թերություններ, ինչո՞ւ ենք դրանից հրճվում, ինչո՞ւ ենք ուրախանում»,-հարցադրում արեց Սեյրան Օհանյանը։
Նա մեկ այլ հարց հնչեցրեց․ «Այսօրվա իշխանությունն ի՞նչ է արել՝ ամրապնդելու համար ՀԱՊԿ-ում որոշումների ընդունման ընթացակարգերը։ Էլ չասեմ, որ ՀԱՊԿ-ում մեր գլխավոր քարտուղարին փորձում էին ազատազրկել։ Մինչեւ ՀԱՊԿ-ին դիմելը ՀՀ իշխանությունը ներսում պետք է որոշեր երկիրը մոբիլիզացնել, բանակի թիկունքն ամրապնդել։ Տպավորություն է, որ իշխանությունը նիրհում է բազկաթոռներին ու ուրիշներին ասում է՝ եկեք մեր երկիրը պահեք։ Ուրիշ երկրի զինվորը չի գա մեր փոխարեն մեր խրամատներում լինի»։
Կարդացեք նաև
Լուիզա ՍՈՒՔԻԱՍՅԱՆ
