Ժամացույցի սլաքը անցել է կեսգիշերը: Այսօր սեպտեմբերի 21-ն է՝ Հայաստանի Անկախության օրը: Պատերազմում զոհված մեր հերոս զինվորների ծնողները այս ժամին «Եռաբլուր» զիվորական պանթեոնում են: Նրանից մի քանիսը այս սրբավայրից հանդես եկան հայտարարությամբ:
«Այսօր շատ կարեւոր օր է՝ սեպտեմբերի 21-ը: Սեպտեմբերի 21-ը առաջին հերթին Անկախության համար պայքարողների, այս տղաների օրն է՝ սկսած ֆիդայական շարժումից: Անկախությունը այս անգամ մեր տղաները պահեցին: Եվ այսօր ով իրեն հայ է համարում, պետք է իմանա, որ Անկախությունը սկսվում է Եռաբլուրից: Եռաբլուրում այն հզոր տղաներն են, որոնք իրենց կյանքի գնով պահեցին այն Անկախությունը, որ մենք դեռ ունենք: Մեր բոլորից է կախված, թե հաջորդ սերունդները կարո՞ղ են Անկախության օրը նշել, թե՞ ոչ:
Մենք ուզում ենք կոչով դիմել բոլոր հայերին: Ես այսօր ոչ մի քաղաքական ուժի չենք դիմում: Թող քաղաքական ուժերն այսօր այստեղ չգան: Ով գալու է, թող գա որպես անհատ, որպես հայ քաղաքացի եւ այստեղ Անկախության օրը նշի: Մենք մինչեւ լույս 22-ի գիշերը գտնվելու ենք այստեղ:
Ինչի՞ ենք գիշերով եկել այստեղ: Վերջերս ԱԺ նախագահը հայտարարեց, թե Հայաստանում դիվերսանտներ կան: Եթե դիվերսանտ կա Հայաստանում, նշանակում է ամսի 21-ի համար են եկել: Մենք այստեղ ենք գտնվում, որ չթողնենք՝ ոչ մի դիվերսանտ ոտք դնի Եռաբլուր: Դրանք լինեն ներքին, թե դրսի դիվերսանտներ:
Կարդացեք նաև
Ամսի 21-ին իշխանությունները գալիս են Եռաբլուր: Գուցե դիվերսանտները կուզեն նաեւ նրանց վնասել: Դրա համար լավ կլինի, որ իրենք չգան այստեղ, որ մեր տղաների անդորրը խանգարեն:
Եթե ազգը միահամուռ լիներ, այսօր նոր շիրիմներ չէինք ունենա: Արդեն չորրորդ օրն է, ամեն օր թարմ շիրիմներ են հայտնվում:
«2018, 2020 թվականից հետո միակ բանը, որ արվել է, Եռաբլուրն է մեծացվել: Եվ մենք այստեղ ենք, որպեսզի ոչ ներքին եւ ոչ էլ արտաքին թշնամիներին չթողնենք գան Եռաբլուր»,-ասաց ծնողներից մեկը եւ ի պատասխան լրագրողներից մեկի ճշտող հարցին, հստակեցրեց, որ չեն ուզում նաեւ Նիկոլ Փաշինյանի գալը Եռաբլուր՝ մեկ անգամ եւս նշելով, որ մտավախություն ունեն, որ դիվերսանտները կարող են նաեւ նրանց համար գալ:
Աշոտ ՀԱԿՈԲՅԱՆ
