Սեպտեմբերի 18-ին լրացավ մեծանուն գիտնական Վիկտոր Համբարձումյանի ծննդյան 114-ամյակը։ Վաղ առավոտյան Բյուրականի աստղադիտարանի աշխատակիցներն այցելեցին Բյուրականի աստղադիտարանի պանթեոն՝ Համբարձումյանի շիրիմ, հարգանքի տուրք մատուցելու համար։
Երկարամյա դիվանագետ, արտակարգ դեսպանորդ եւ լիազոր նախարար Ռուբեն Շաքարյանը, որ 10 տարի շարունակ եղել է ԳԱԱ նախագահ Վիկտոր Համբարձումյանի օգնականը` արտաքին կապերի գծով, ամեն տարի այդ օրը ծաղիկներ է դնում Համբարձումյանի արձանի պատվանդանի մոտ ու իր հարգանքի տուրքը մատուցում: Պարոն Շաքարյանն ասում է, որ աշխատել է 13 տարեկանից, եւ իր կյանքի լավագույն տարիները մեծ գիտնականի հետ անցկացրած տարիներն են:
«Ես համարում եմ, որ Վիկտոր Համբարձումյանն աշխարհի ամենահայտնի հայն է: Աշխարհահռչակ մարդ էր, ես պարծեցել եմ միշտ, որ իր օգնականն եմ եղել: Ես արվեստի գործերի շատ մեծ հավաքածու ունեմ, բայց առանձնապես թանկ է Համբարձումյանի պորտրետը, որ նկարնել է Մարտիրոս Սարյանը 1949թ.: Երբ 1949թ. Օրբելիից հետո Վիկտոր Համբարձումյանը դարձավ ԳԱԱ նախագահ, Մարտիրոս Սարյանը նկարեց նրան: Այժմ այդ նկարը կախված է իմ տան ամենակարեւոր տեղում»,- Aravot.am-ի հետ զրույցում ասաց Ռուբեն Շաքարյանը:
Կարդացեք նաև
Հավելենք, որ Վիկտոր Համբարձումյանը մեծ ներդրում ունի աստղագիտության եւ աստղաֆիզիկայի, տիեզերածնության, տեսական ֆիզիկայի, մաթեմատիկայի եւ փիլիսոփայության ամենատարբեր ոլորտներում: Նա հատկապես հայտնի է տարրական մասնիկների ֆիզիկայի, մոլորակային միգամածությունների տեսության, աստղային դինամիկայի, Գալակտիկայի տարիքի որոշման, ճառագայթման տեղափոխման տեսության, աստղասփյուռների, ակտիվ գալակտիկական միջուկների, գերխիտ աստղերի, բռնկվող եւ այլ անկայուն աստղերի վերաբերյալ կատարած աշխատանքներով եւ հայտնագործություններով:
Ի դեպ, 2009թ.-ից սեպտեմբերի 18-ը Հայաստանում նշվում է նաեւ որպես աստղագիտության օր։
Գոհար ՀԱԿՈԲՅԱՆ
«Առավոտ» օրաթերթ
20.09.2022
