Մենք արդեն անդրադարձել ենք այսպես կոչված «հայկական» արբանյակի առիթով անիմաստ հրճվանքին, նշելով, որ սարքը, որի ստեղծմանը որևէ ներդրում չունի որևէ ՀՀ մասնագետ, «հայկական» կոչվել չի կարող: Դա նույնն է, ինչ ուրիշի ստեղծած կոշիկը կոչել հայկական: Միջազգային տեղեկատուներում այն նշված է որպես իսպանական արբանյակ, Հայաստանը որպես երկիր որևէ առնչություն չունի, և այն CubeSat դասի միկրո-արբանյակ է, որ համարվում են կրթական, սիրողական սարքեր, դրանցով չի հպարտանում որևէ սովորական համալսարան, և որոնցով ստացված տվյալները չեն օգտագործվում լուրջ նպատակներով: Նաև նշել ենք, որ ներկայումս տիեզերքից ստացված ցանկացած որակի պատկեր կարելի է ստանալ պատվերով: Վերջապես, CubeSat արբանյակների գնացուցակները համացանցում են, և մեր հարկատուն պետք է իմանա ինչքան է ծախսվել այդ գործարքի համար:
Մինչդեռ տեղական տիեզերագնացության «մասնագետները» շարունակում են ակտիվությունը: Այս օրերին Փարիզում ընթացող 73-րդ միջազգային տիեզերագնացության համաժողովում (IAC-73) ՀՀ պատվիրակության կազմն է՝ բարձր տեխնոլոգիական արդյունաբերության փոխնախարարը, նախարարության շուկայի զարգացման վարչության շուկայի հետազոտության բաժնի պետը, շուկայի զարգացման վարչության առեւտրի խթանման բաժնի գլխավոր մասնագետը:
Փոխնախարարը, որը վերջերս թաղապետ էր, այսինքն զբաղված էր աղբահանության և նման ոլորտով, այսօր, շուկայի մասնագետների հետ, ներկայացնում է ՀՀ տիեզերագնացությունը: Այդ համաժողովին, որին մասնակցում են ոլորտի խոշորագույն մասնագետներ, տիեզերական գործակալությունների և ծրագրերի կարկառուն ղեկավարներ, նման մասնակցությունը վարկաբեկիչ է մեր երկրի համար /հարկատուի հաշվին զբոսաշրջությունը/: Դա հատկապես անթույլատրելի է, նկատի ունենալով ոչ միայն Հայաստանում տիեզերական սարքաշինության բացառիկ պատմությունը, այլ նաև այսօր ի դեմս անվանի գիտնական պրոֆեսոր Վահագն Գուրզադյանի մասնակցության՝ նաև ղեկավար կազմերում, եվրոպական արբանյակային ծրագրերում:
Կարդացեք նաև
Տիեզերական տեխնոլոգիաները լրջագույն բնագավառ է, որպեսզի այն թողնել բախտախնդիրներին, ծաղրանքի առարկա դարձնելով մեր երկիրը:
Աշոտ ԶԱԽԱՐՅԱՆ,
Հայաստանի պետական մրցանակի դափնեկիր, տիեզերական ծրագրերի առաջատար ճարտարագետ
Ալեքսանդր ԿԱՇԻՆ,
Հայաստանի պետական մրցանակի դափնեկիր, տիեզերական ծրագրերի առաջատար ճարտարագետ
