«Ադրբեջանաղարաբաղյան հակամարտությունը կարգավորված չէ եւ դեռ պետք է կարգավորվի՝ առաջնահերթ Արցախի ժողովրդի ինքնորոշման իրավունքի եւ դրա իրացման արդյունքների լրիվ ու անսակարկելի ճանաչման հիման վրա»,-առցանց տեսաուղերձում այսօր հայտարարեց Արցախի հանրապետության նախագահ Արայիկ Հարությունյանը։ Նա նշեց, որ 44-օրյա պատերազմի հետեւանքով անհիմն եւ ժամանակավրեպ են դարձել հակամարտության կարգավորման հիմքում ընկած երեք սկզբունքներից երկուսը՝ տարածքային ամբողջականությունը, ուժի սպառնալիքի կիրառման անթույլատրելիությունը։
«Ադրբեջանական ագրեսիան եւ մարդկության դեմ հանցագործություններն ամրապնդել են ինքնորոշման մեր իրավունքի պաշտպանության անհրաժեշտությունը՝ որպես միջազգային հանրության կողմից չիրականացված սկզբունք եւ պարտավորություն ու Արցախի ժողովրդի ֆիզիկական գոյության երաշխիք։ Միջազգային դերակատարներին հորդորում եմ կատարել իրենց պարտավորությունը եւ ճանաչել Արցախի ժողովրդի ինքնորոշման իրավունքն ու Արցախի հանրապետության անկախությունը։ Անընդունելի եւ անհիմն են փորձերը՝ Ադրբեջանի տարածքային ամբողջականության սկզբունքի միջոցով ստվեր գցելու Արցախի ժողովրդի ինքնորոշման իրավունքի վրա։ Ինքնորոշման իրավունքի միակ սուբյեկտն Արցախի ժողովուրդն է, որը չի դադարեցնելու սեփական հայրենիքում ճակատագիրը տնօրինելու գործում պայքարը»,-շեշտեց Արցախի նախագահը։
Նրա խոսքով՝ հիմա էլ իրենք առաջնորդվում են մեկ միասնական՝ հայկական հայրենիքի գաղափարով, եւ պետք է գիտակցել անպատասխանատու վարքի հետեւանքները․ «Ինքնորոշման իրավունքի եւ ազգային շահերի հիման վրա շարունակելու ենք ձգտել Արցախի անկախության ճանաչումը, որը չպետք է հարվածի տակ դնի մայր Հայաստանի հետ ինտեգրման բարձր մակարդակը»։
Կարդացեք նաև
Լուիզա ՍՈՒՔԻԱՍՅԱՆ
