«Այս վերջին զարգացումները թերևս վերջին շրջանում են, իսկ ԼՂ ժողովրդի նկատմամբ վերաբերմունքը, պատմական հուշարձանների հանդեպ վերաբերմունքի հարցերը վաղուց ի վեր մեր ուշադրության կենտրոնում են»,- ՀՀ ԱԺ նախագահ Ալեն Սիմոնյանի հետ մամուլի ասուլիսի ժամանակ հայտարարեց ԱՄՆ Կոնգրեսի Ներկայացուցիչների պալատի խոսնակ Նենսի Փելոսին՝ պատասխանելով հարցին՝ ժողովրդավարությունը, մարդկային արժեքները կարևորող Վաշինգտոնն ինչո՞ւ Իլհամ Ալիևին պատժամիջոցների չի ենթարկում ՀՀ-ի, Արցախի խաղաղ բնակիչներին ռազմական հանցագործությունների ճանապարհով կյանքից զրկելու համար, արդյոք հնարավո՞ր է, որ Ադրբեջանը ևս պատժամիջոցների ենթարկվի։
Ինչպես արդեն տեղեկացրել ենք, ՀՀ ԱԺ նախագահ Ալեն Սիմոնյանի հրավերով Հայաստանում է ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի գլխավորած պատվիրակությունը:
Ներկայացուցիչների պալատի խոսնակին ուղեկցում են ԱՄՆ Ներկայացուցիչների պալատի Էներգետիկ եւ կոմերցիոն հարցերով հանձնաժողովի նախագահ Ֆրանկ Փալոնեն, Ներկայացուցիչների պալատի անդամներ Աննա Էշուն եւ Ջեքի Սփիերը:
Նենսի Փելոսին ըստ էության չպատասխանեց այս հարցին, միայն նշեց․ «ԱՄՆ նախագահը աջակցել է ցեղասպանության բանաձևի ընդունմանը, հրավիրել է ՀՀ-ին մասնակցելու ժողովրդավարության գագաթնաժողովին, և մենք շարունակելու ենք մեր երկար ճանապարհն աշխատելու այս հարցերի ուղղությամբ»։
Կարդացեք նաև
Նենսի Փելոսին նաև շեշտեց՝ մենք այստեղ ենք այդ համագործակցությունը, աջակցությունը շարունակելու․ «Ուզում ենք տեսնել հրադարարը և վերջին օրերին տեղի ունեցած իրադարձությունների դատապարտումը»։
Տաթև ՀԱՐՈՒԹՅՈՒՆՅԱՆ
