Նիկոլ Փաշինյանի հրաժարականը պահանջող ինքնաբուխ հանրահավաքների մասնակից, 44-օրյա պատերազմում նահատակված Մենուա Հովհաննիսյանի մայր, «5165 շարժման» համահիմնադիր Կարին Տոնոյանը Aravot.am-ի հետ զրույցում պատմեց, թե ինքն ինչ է ակնկալում խորհրդարանական խմբակցություններից:
«Ընդդիմադիր պատգամավորները պետք է գան, հայտարարեն իրենց թեկնածուի անունը եւ սկսեն գործընթացը, կամ պիտի ասեն, որ չունեն կոնկրետ թեկնածու: Եվ կամ ժողովրդին առաջարկեն անուններ առաջադրել, կամ իրենք ասեն անուններ ու ժողովուրդը ընտրություն կատարի: Ի վերջո, անելանելի վիճակներ չկան: Եթե թեկնածու չկա, ինչ է՝ մենք այսպես նստելու ենք ու Նիկոլը մնա՞, երազենք, որ նա իր կամքով գնա՞: Ինքը իր կամքով չի գնա: Սա է ամբողջ խնդիրը:
Որեւէ պատգամավոր թող չմտածի, թե երկնքից իջած առաքելություն է միայնակ երկրի ճակատագիրը որոշելը, որեւէ մի պատգամավոր թող չմտածի, թե ինքը կարող է մեզ զրկել մեր երկրի համար պայքարելու իրավունքից: Հետեւաբար, բոլորը թող գան եւ ամեն մեկը իր գործը անի այնպես, ինչպես իր խղճին է պատասխանատու, իր մտքին համապատասխան:
Ես իմ պայքարը այսպես եմ տանում: Ես հստակ գիտեմ՝ ես ինչ եմ ուզում եւ գնում եմ իմ ուզածի հետեւից: Այս երկիրը պիտի ղեկավարեն կարող, հայրենասեր, նվիրումով, մաքուր ձեռքերով մարդիկ: Այլընտրանք չկա: Եվ բոլորը պետք է օգնեն նրանց: Հակառակ դեպքում ապացուցում են իրենց անհայրենասիրությունը»,-ասաց նա:
Կարդացեք նաև
Աշոտ ՀԱԿՈԲՅԱՆ
