«Մեզ պետք է փոխարինել Նիկոլ Փաշինյանին, որը պետության շահերի դեմ է գործում։ Եթե բանակը հերոսաբար չդիմադրեր, այսօր կարող էինք Սյունիքն արդեն կորցրած լինել։ Բանակի հերոսական դիմադրությունն է թշնամուն հետ շպրտել, որը սեպտեմբերի 14-ին Ջերմուկից եղել է 1,5 կմ-ի վրա։ Հիմա գտնվում է 7 կմ-ի վրա»,- Հանրապետության հրապարակում հավաքի ժամանակ այսօր լրագրողների հետ ճեպազրույցում ասաց «Համախմբում» շարժման անդամ, «ԱրԱր» հիմնադրամի համահիմնադիր Ավետիք Չալաբյանը։
Նշենք, որ ավելի ուշ ՀՀ ԶՈՒ ԳՇ պետ Էդվարդ Ասրյանը Ջերմուկում դեսպանների հետ հանդիպման ժամանակ հայտնել է, որ հակառակորդը Ջերմուկից գտնվում է 4.5 կիլոմետր հեռավորության վրա, մինչ ռազմական գործողությունը եղել է 12 կմ հեռավորության վրա․ «Հաշվի առնելով հակառակորդի գերակշռությունը՝ որոշ մարտական դիրքեր կորցրել ենք և հակառակորդը այդ ճեղքվածներով կարողացել է հարյուրավոր ստորաբաժանումներով ներթափանցել մեր պաշտպանության խորքը»։
«Մեր դիտարկումները ցույց են տալիս, որ թշնամին մոտ 5 կմ նահանջել է այն դիրքերից, որոնց եկել-հասել էր։ Դա մեր բանակի դիմադրությունն է, բայց այս իշխանությունն իր գործունեությամբ բերել է այն վիճակին, որ ՀՀ-ն մնացել է մենակ։ ՀՀ-ն նաեւ անպատրաստ էր։ Չպետք է ունքը սարքելու տեղը աչքն էլ հանել։ Նման պայմաններում եթե ուզում ես իշխանություն փոխել, սկզբում այլ՝ գործունյա իշխանություն է պետք ձեւավորել փողոցում։ Երբ ԽՍՀՄ-ը քանդվում էր, իշխանությունը ՀՀ-ում սկզբում ձեւավորվեց փողոցում՝ «Ղարաբաղ կոմիտեի» տեսքով»,-հիշեցրեց նա։
Կարդացեք նաև
Ըստ Չալաբյանի՝ հիմա փողոցում իշխանության ձեւավորումը պետք է լինի կազմակերպված կառույցների միջոցով․ «Մենք հիմա աշխատում ենք, որպեսզի նման կառույցներ ձեւավորվեն։ Դա հեշտ չի, արագ չի, որովհետեւ այս խունտան գրավել է պետությունը։ Հեշտ չի, որովհետեւ ընդդիմության տարբեր թեւերը լավ չեն գործակվում իրար հետ, բնակչությունն էլ հուսալքված է»։
Հիշեցնենք, որ սեպտեմբերի 13-ից Ադրբեջանը լայնածավալ ռազմական հարձակում է իրականացնում ՀՀ-ի սուվերեն տարածքների դեմ՝ Գեղարքունիքի, Վայոց ձորի եւ Սյունիքի սահմանային հատվածներից։
Լուիզա ՍՈՒՔԻԱՍՅԱՆ
