«Մենք պետք է արձանագրենք, որ իրադրությունը շարունակում է մնալ լարված եւ անվտանգության խորհրդի ֆորմատով քննարկել ենք ՀՀ-ում ռազմական դրություն մտցնելու նպատակահարմարությունը եւ եկել ենք եզրակացության, որ այս պահին նման որոշման պետք է չգնանք»,- այսօր կառավարության նիստում հայտարարեց ՀՀ վարչապետ Նիկոլ Փաշինյանը՝ հավելելով, որ բազմաթիվ քաղաքացիներից առաջարկներ են ստանում, կան քաղաքացիներ, որոնք ասում են՝ ռազմական դրության էին սպասում, որ մասնակցեն մեր երկրի ինքնիշխանության, տարածքային ամբողջականության պաշտպանությանը:
«Անվտանգության խորհրդի նիստում դա էլ ենք քննարկել եւ եկել այն եզրակացության, որ եթե կան մարդիկ, որոնք ուզում են ներգրավված լինել, կարող են սովորական ընթացակարգով, կամավորության հիմքով դիմել զինկոմիսարիատներ եւ այդ խնդիրը կլուծվի: Առավել եւս, մենք հիմա նախկինում կայացրած որոշումների շրջանակներում, եռամսյա հավաքների գործընթացը շարունակական է, ուժի մեջ է: Կան բոլոր օրենսդրական հիմքերը, կամավորության հիմունքներով քաղաքացիներին ներգրավել ծառայության մեջ»,- ասաց նա:
Պաշտպանության նախարար Սուրեն Պապիկյանն էլ հավելեց, որ թե «Աշխարհազորի մասին» օրենքը, թե եռամսյա հավաքների կառավարության որոշումները, թե «Պաշտպանության մասին» օրենքը այդ հնարավորությունները տալիս են. «Բոլոր այն քաղաքացիները, որոնք ուզում են այսօր կամավորության հիմունքներով զինվորագրվել եւ գնալ պատրաստության, անհրաժեշտության դեպքում նրանց կիրառելիությունն ապահովելու համար, զինկոմիսարիատները պատրաստ են նրանց ընդունել, տեղորոշել ըստ վայրերի»:
Այլ մանրամասները՝ տեսանյութում
Կարդացեք նաև
Նելլի ԳՐԻԳՈՐՅԱՆ
