ՄԱԿ-ի անվտանգության խորհրդի նիստում, որը հրավիրել էր այդ կառույցում նախագահող Ֆրանսիան, քննվում էր հայ-ադրբեջանական սահմանին ստեղծված իրավիճակը: «Ֆրանսիան մտահոգված է Հայաստանի եւ Ադրբեջանի միջեւ սահմանին եղած ռազմական գործողություններով, որի արդյունքում տասնյակ մարդիկ են զոհվել, գնդակոծման են ենթարկվել քաղաքացիական բնակավայրեր, քաղաքացիական ենթակառուցվածքներ՝ Հայաստանի տարածքում: Խոսքը 2020 թվական պատերազմից հետո եղած ամենախոշոր ռազմական բախման մասին է: Այս լարվածության ֆոնին Ֆրանսիան իր գործընկերների հետ ջանքեր է գործադրում կրակի դադարեցումը պահպանելու համար»,- ասաց ՄԱԿ-ում Ֆրանսիայի մշտական ներկայացուցիչ Նիկոլա դե Ռիվիերը:
Հավելեց, որ նախագահ Մակրոնը բանակցությունների մեջ է եղել ՀՀ վարչապետի եւ Ադրբեջանի նախագահի հետ, նաեւ զրույցներ ունեցել իր հայ եւ ադրբեջանցի գործընկերների հետ:
Ֆրանսիայի ներկայացուցիչն ընդգծեց, որ ադրբեջանական ուժերը պետք է վերադառնան նախնական դիրքեր, իսկ Հայաստանի եւ Ադրբեջանի միջեւ սահմանագծումն եւ սահմանազատումը պետք է իրականացվեն բացառապես բանակցությունների ճանապարհով եւ ոչ թե ռազմական բախումների. «Հայաստանի տարածքային ամբողջականությունը պետք է պահպանվի, կողմերը պետք է ակտիվացնեն երկխոսությունը, որպեսզի հարցերը լուծվեն խաղաղ ճանապարհով, առանց նոր միջադեպերի»:
Նա կոչ արեց չխոչընդոտել մարդասիրական գործողությունների իրականացմանը, նաեւ ողջունեց 5 հայ գերիների վերադարձը: Նշեց, որ որպես Մինսկի խմբի համանախագահ եւ ԵՄ անդամ երկիր՝ Ֆրանսիան բոլոր ջանքերը կգործադրի տարածաշրջանում խաղաղության հաստատման ուղղությամբ, նաեւ կարեւորեց, որ երկու երկրները հավատարիմ մնան նոյեմբերի 9-ի եռակողմ համաձայնագրին:
Կարդացեք նաև
Գոհար ՀԱԿՈԲՅԱՆ
