ՄԱԿ-ի անվտանգության խորհրդի նիստում քննվում է հայ-ադրբեջանական սահմանին ստեղծված իրավիճակը։ ՄԱԿ-ի գլխավոր քարտուղարի՝ Եվրոպայի, Կենտրոնական Ասիայի եւ ԱՄՆ-ի քաղաքական հարցերով օգնական Միրոսլավ Յենչան իր ելույթում նշեց. «Սեպտեմբերի 12-ի երեկոյան ՀՀ իշխանությունները հայտնել են սահմանին ծագած ծանր մարտերի մասին: Այդ հայտարարության համաձայն՝ կիրառվել է ծանր հրետանի, եղել գնդակոծություններ խոշոր տրամաչափի զինատեսակներից, փոխհրաձգությունը շարունակվել է սեպտեմբերի 13-14-ին:
Երեկ երեկոյան հայտարարվել է հրադադարի մասին՝ սկսած ժամը 8-ից: Մենք ողջունում ենք այդ պայմանավորվածությունը եւ հույս հայտնում, որ կրակի դադարեցումը կպահպանվի: ՀՀ պաշտպանության նախարարությունը հայտնել էր, որ Ադրբեջանը հարվածներ է հասցրել ոչ միայն ռազմական դիրքերին, այլեւ քաղաքացիական ենթակառուցվածքներին Գեղարքունիքում, Վայոց Ձորում եւ Սյունիքում: Հայկական կողմը հայտնել է, որ զոհվել է 105 զինծառայող, 6 քաղաքացիական անձ վիրավորում է ստացել: Հայաստանը այդ իրադարձությունները որակել է կանխամտածված հարված:
Ադրբեջանն էլ ասել է, որ դրանք պատասխան քայլեր էին հայկական կողմի սադրանքին: Ադրբեջանն իր հերթին հայտնել է, որ 71 զինծառայող է զոհվել, 2 քաղաքացիական անձ վիրավորվել է: Երկու երկրները նամակներ են ուղղել ՄԱԿ-ի գլխավոր քարտուղարին այն մասին, որ խախտվել է իրենց տարածքային ամբողջականությունը: ՄԱԿ-ի գլխավոր քարտուղարությունը չի կարող ստուգել կամ պնդել այդ հաղորդագրություններում առկա կոնկրետ տարրերը, բայց մենք շատ մտահոգ ենք այս լարվածության առիթով եւ քաղաքացիական բնակչության վրա դրա հետեւանքներով»:
ՄԱԿ-ի գլխավոր քարտուղարի օգնականի ձեւակերպմամբ, Հայաստանի եւ Ադրբեջանի հարաբերությունների կարգավորումը նախկինի նման լուրջ խոչընդոտների է հանդիպում. «Այս լարվածությունն ընդգծում է, որ երկրները պետք է շարժվեն առաջ՝ սահմանազատման եւ սահմանագծման առումով, տարածքային ամբողջականությունների փոխադարձ ճանաչման եւ ինքնիշխանության շրջանակներում: Հորդորում եմ կողմերին օգտվել այդ կարեւոր մեխանիզմից՝ իբրեւ կարեւոր քայլ սահմաններին լարվածության թուլացման համար:
Կարդացեք նաև
Այս շաբաթվա իրադարձություները հիշեցրին, որ լարվածությունը Հայաստանի եւ Ադրբեջանի միջեւ կարող է ապակայունացնել ամբողջ տարածաշրջանը: Անհրաժեշտ է, որ տարածաշրջանի բոլոր խաղացողները կառուցողական գործեն եւ ճնշում գործադրեն, որպեսզի կողմերը հակվեն խնդրի խաղաղ կարգավորման»: Նա հիշեցրեց, որ Ռուսաստանը եւ Եվրամիությունը ջանքեր են գործադրում այդ ուղղությամբ, եւ ՄԱԿ-ի անվտանգության խորհուրդը աջակցում է միջազգային ջանքերին:
Գոհար ՀԱԿՈԲՅԱՆ
