ՍԴ դատավոր Արեւիկ Պետրոսյանի պաշտոնավարման ժամկետը լրանում է այս տարվա դեկտեմբերին: Կառավարությունը Սահմանադրական դատարանի դատավորի պաշտոնում առաջադրել է Սեդա Սաֆարյանի թեկնածությունը: Այսօր ԱԺ-ում հարցի քննարկման ժամանակ ՔՊ պատգամավոր Հովիկ Աղազարյանը խնդրեց ներկայացնել իր պատկերացումները՝ քրեական ենթամշակույթի դեմ պայքարի ճանապարհների մասին: Սեդա Սաֆարյանը պատասխանեց, որ քրեական ենթամշակույթը խորքային խնդիր է ու նրանք ազդում են քրգործերով ցուցմունքներ տվող անձանց վրա: Ավելին` չցանկացավ ասել, որովհետեւ ՍԴ-ում քննվում է այդ մասին օրենսդրական նորմի սահմանադրականության հարցը ու կարող է հետո կաշկանդվել, չմասնակցել քննարկմանը:
Աղազարյանը հետաքրքրվեց՝ ի՞նչ կարծիք ունի թեկնածուն, եթե ՍԴ-ն վերանա ու ստեղծվի Գերագույն դատարան՝ համապատասխան պալատով՝ Սեդա Սաֆարյանը պատասխանեց, որ ինչ երկրի համար հարմար է, խնդիր չկա: Եթե իրավական համակարգը հանգի հետեւության, որ մեզ ՍԴ պետք չէ, դատարանների միավորում պետք է լինի, իր համար կարեւոր չէ, որովհետեւ ոչ թե կառուցվածքային փոփոխությունն է կարեւորում, այլ՝ մարդկանց աշխատանքը:
«Հայաստան» խմբակցության պատգամավոր Գեղամ Մանուկյանը հայտարարեց, որ Սահմանադրական դատարանի կարգավիճակը, հեղինակությունը վաղուց արդեն նսեմացվել է, երբ ապագայում ԿԸՀ-ի նախագահության թեթեւ նախագծով իշխանության կողմից ձեւախեղվեց ընդհանրապես ՍԴ-ն:
Կարդացեք նաև
ԱԺ նիստում նաեւ ներկայացվեց ՍԴ դատավորի թեկնածու Հովակիմ Հովակիմյանի թեկնածությունը: ՔՊ պատգամավոր Վիգեն Խաչատրյանն ասաց, որ ժամանակին ՀՀ արդեն նախկին դատախազը անկեղծացավ ու ասաց, որ ՍԴ-ի թեթեւ ձեռքով կոծկվեց Մարտի 1-ի արդարադատության ընթացքը. «Ես էլ եմ համոզված, որ մեր ՍԴ որոշ անդամներ իրենց այդ կոծկելով պատասխանատուներից մեկն են այն այլանդակությունների, որ մենք շարունակում ենք դիտել ու դուք էլ այսօր ներկա եղաք: Երեկվա մեր հայրենակիցների այդ անախորժությունը, իշխանությունը գողանալը, չե՞ք կարծում, որ ՍԴ-ի կոծկելու հետեւանքներից մեկն էլ սա է»: Նա հորդորեց գնահատական տալ ՍԴ այդ դատավորներին, որոնք «պետականության ընթացքին վնասարար որոշում» են ընդունել:
Հովակիմ Հովակիմյան
Հովակիմյանը դա չարեց՝ ասելով, որ լիազորված չի դատավորների որոշումները որակել, բայց որ ՍԴ որոշումների պատճառաբանված մասը պետք է հանրային ձեւով ներկայացնի՝ այդ առումով գուցե անելիք կա. «Պատասխանատվության ենթարկելը օրենքով կարգավորվող գործընթաց է, որը գուցե հետագայում քննարկման առարկա դառնա»:
Ինչպես հայտնել ենք, նիստերի դահլիճում «Հայաստան» խմբակցության պատգամավոր Գեղամ Մանուկյանի հայտարարությունից հետո սկսեց թեժ վիճաբանություն: ԱԺ փոխնախագահ Հակոբ Արշակյանը, ՔՊ խմբակցության քարտուղար Արթուր Հովհաննիսյանը կոչ արեց հանդուրժողական լինել: Հովիկ Աղազարյանը հակադարձեց, թե ցուցարարները ախր կոչ են անում գնալ պատգամավորների տները. «Տիկին Հակոբյանը երեւի թե այդ պահին միայնակ էր երեխայի հետ, կոչ են անում նրան բերման ենթարկել: Մենք էլ պիտի տոլերանտ լինենք: Տոլերանտության արդյունքում ԱԺ հայտարարությունը, որ պետք է ընդունեինք, ընդունեցինք ուշ, գրեթե վերջին երկրների հետ, որ ընդունեցին այդ հայտարարությունը: Այն դեպքում, երբ ընդդիմությունը բերել էր 4 կետանոց էջ, որոնցից մեկն ասում էր՝ դուք ռադներդ քաշեք, հետո մենք կիմանանք ինչ ենք անում»:
Հռիփսիմե ՋԵԲԵՋՅԱՆ
