ԱԺ նիստերի դահլիճում «Հայաստան» խմբակցության պատգամավոր Գեղամ Մանուկյանի ելույթից եւ դրան հաջորդած՝ ՔՊ-ականների բղավոցներից հետո կայացած վիճաբանությունը շարունակվեց նաեւ ԱԺ միջանցքներից մեկում։ Ընդդիմադիր խմբակցությունների պատգամավորների աշխատասենյակների ուղղությամբ մեծ թվով անվտանգության աշխատակիցներ կուտակվեցին։
«Սադրիչներ են»,-բղավում էին «Հայաստան» խմբակցության պատգամավորներ Ասպրամ Կրպեյանը, Քրիստինե Վարդանյանն ու Արմենուհի Կյուրեղյանը։
Կարդացեք նաև
Այստեղ էին նաեւ «Պատիվ ունեմ» խմբակցության մի քանի պատգամավորներ, այդ թվում՝ Աննա Մկրտչյանն ու Հայկ Մամիջանյանը։ Մի քանի րոպե տեւած խառնաշփոթից հետո անվտանգության աշխատակիցներն ինչ-որ մեկին հեռացրին տարածքից, լրագրողներին էլ հորդորեցին չխախտել իրենց համար սահմանված աշխատանքային գոտու սահմանները։
Րոպեներ անց «Հայաստան» խմբակցության պատգամավոր Արմենուհի Կյուրեղյանը լրագրողներին հայտնեց, որ ՔՊ-ականները վեճը փորձել են շարունակել դահլիճից դուրս, եւ իրենց պատգամավորներ Բաբկեն Թունյանի ու Նարեկ Բաբայանի հետ եկել է մի կասկածելի անձ, որը բղավել է՝ «ինչո՞ւ եք հայհոյում»։ Մինչդեռ, Արմենուհի Կյուրեղյանի պնդմամբ, ընդդիմադիրներից որեւէ մեկը չի հայհոյել, այդ անձն այդպես է բղավել՝ իր սադրանքն արդարացնելու համար։
ՔՊ խմբակցության պատգամավոր Բաբկեն Թունյանի պարզաբանումը՝ շուտով։
Լուիզա ՍՈՒՔԻԱՍՅԱՆ
