Բաղրամյան պողոտայում լարված վիճակ է: Քաղաքացիներից ամեն մեկն իր առաջարկն ունի, կան քաղաքացիներ, որոնք ուզում են մտնել դատարկ ԱԺ շենք: 5165 շարժման առաջնորդ Կարին Տոնոյանը կոչ է անում սադրանքների չդիմել՝ բացատրելով, որ անիմաստ է դատարկ ԱԺ շենք մտնելը: Նա կոչով դիմեց նաեւ ՔՊ պատգամավորներին:
«Մենք ձեր տեղը գիտենք, բայց ձեզ համար ավելի հարգալից կլինի, որ դուք գաք, ստորագրեք»,- հայտնեց Կարին Տոնոյանը:
Ցուցարարներին կառավարելը դարձել է շատ դժվար, բեմահարթակում կանգնածները պարբերաբար կոչ են անում մեկ րոպե լռությամբ հարգել զոհերի հիշատակը, աղոթել:
Ավելի ուշ զոհվածների հարազատներին կանչեցին առաջ:
Կարդացեք նաև
Հավաքվածները նաեւ քննարկեցին, թե ինչքան ժամանակ տան ՔՊ-ական պատգամավորներին, որ նրանք գան ստորագրեն վարչապետին անվստահություն հայտնելու թուղթը: Ընդհանուր քննարկման արդյունքում որոշվեց նրանց եւս, ինչպես ընդդիմադիր պատգամավորներին, տալ մեկ ժամ ժամանակ:
«ՔՊ-ականներին տալիս ենք ժամանակ, ոչ թե ժամ ենք դնում նրանց վրա, այլ, ժամանակ ենք տալիս, որ շուտ վերջացնենք, գնանք երեխեքի մոտ: ՔՊ-ի պատգամավորներին մեկ ժամ, չեկաք, գալու ենք ձեր տները»,-հայտարարեցին բեմահարթակից:
Արփինե ՍԻՄՈՆՅԱՆ
