Ադրբեջանի ագրեսիայի դեմ սանկցիաների կիրառման պահանջով բողոքի ցույց կայացավ ՄԱԿ-ի հայաստանյան գրասենյակի դիմաց: «Այսօր ադրբեջանական կողմը պատերազմ է հայտարարել Հայաստանին: Մենք եկել ենք միջազգային կառույցներից խնդրելու, հորդորելու, որ եթե կա ՄԱԿ-ի անվտանգության խորհուրդ հասկացությունը, ապա այն պետք է անդամ-երկրների համար նման դեպքերում միջամտություն ունենա: Պետք է քայլեր ձեռնարկեն ագրեսոր պետություններին սանձելու համար: Մենք ուզում ենք, որ Ադրբեջանի նկատմամբ հնարավորինս արագ պատժամիջոցներ կիրառվեն: Չենք ուզում, որ աշխարհը մեր ցավը դարձյալ նավթով ու հանքահորերով չափի, որովհետեւ այսօր սահմանին զոհվում են 18 տարեկան տղաներ: Այդ տղաների մահը ծանրանալու է հենց միջազգային հանրության խղճին, որովհետեւ քայլ չարեցին ադրբեջանական ագրեսիան զսպելու համար»,-ասաց ցույցի մասնակիցներից Արմինե Մելքոնյանը:
Ցույցի մասնակիցները նշեցին, որ ցանկություն ունեն հանդիպել ՄԱԿ-ի հայաստանյան գրասենյակի ղեկավարի հետ եւ ներկայացնել, թե ինչպես են Վարդենիսում, Սոթքում, Ջերմուկում եւ Սյունիքում կրակում նաեւ խաղաղ բնակիչների վրա: «Դա պատերազմական հանցագործություն է, մենք ուզում ենք բարձրաձայնել Ադրբեջանի կողմից պատերազմական հանցագործությունների մասին, Ադրբեջանին չպետք է թվա, որ իր գործողություններն արդարացված են ցանկացած ֆրոնտում»,-ասաց նա: Ցույցի մասնակիցը կոչ արեց տանը նստածներին եւս միանալ բողոքի գործողություններին:
Տիկնանց ի վերջո, ընդունեցին ՄԱԿ-ի գրասենյակում: Նրա խոսքով, ՄԱԿ-ի հայաստանյան գրասենյակի մշտական համակարգողի պաշտոնակատար Լիլա Փիթրս Յահիան ամբողջովին լծված է Հայաստանից դեպի ՄԱԿ-ի կենտրոնական գրասենյակ ինֆորմացիա տեղափոխելով, սակայն իրենց ակնկալիքները բավարարված չեն. «Ակնկալում էինք, որ այսօրվա նիստը պետք է լինի Ադրբեջանի նկատմամբ պատժամիջոցների կիրառման մասին, սակայն զուտ փաստերի ներկայացման մասին է լինելու… Ցավոք, մեր դիվանագիտական կորպուսը կաղում է, եւ այսօր էլ հարիսայով լցված կաթսայի մոտ կանգնած ենք թղթե շերեփով»։
Կարդացեք նաև
Գոհար ՀԱԿՈԲՅԱՆ
