«Եթե խաղաղություն ենք ուզում, պետք է պատրաստ լինենք մեզ պաշտպանել։ Ուստի խաղաղության օրակարգն իրականում մերն է։ Փաշինյանի օրակարգը միակողմանի զիջումների եւ պարտության օրակարգն է»,-խորհրդարանում լրագրողների հետ ճեպազրույցում այսօր ասաց «Հայաստան» խմբակցության պատգամավոր Արթուր Խաչատրյանը։
Հիշեցնենք, որ Ադրբեջանը լայնածավալ ռազմական հարձակում է սկսել ՀՀ-ի դեմ՝ Գեղարքունիքի, Վայոց ձորի եւ Սյունիքի սահմանային հատվածներից։
«Դեռ 98թ․-ին Լեւոն Տեր Պետրոսյանն ասում էր, որ խաղաղության կուսակցությունը պարտվեց, իշխանության եկավ պատերազմի կուսակցությունը։ Իրականում ի՞նչ տեղի ունեցավ։ Իր հոգեզավակը, որը խոսում է խաղաղությունից, իր ժամանակ ունեցանք պատերազմ»,-նշեց Արթուր Խաչատրյանը։
Կարդացեք նաև
Նա նաեւ նշեց, որ ընդդիմությունը միշտ ասել է՝ պետք է պատրաստ լինել պատերազմի․ «Մեր զինված ուժերը պատրա՞ստ էին այս հարձակմանը։ Մեր տեղեկություններով՝ մեր ստորաբաժանումները հանկարծակիի են եկել։ Ի դեպ, 2020թ․-ի պատերազմի ժամանակ դաշնակցական վաշտերը Երեւանից ավելի շուտ հասան Արցախ, քան պաշտպանության նախարարը վերադարձավ Հայաստան»։
Լուիզա ՍՈՒՔԻԱՍՅԱՆ
