«Հասկանալի է, որ Ադրբեջանը երեկ սանձազերծած պատերազմով պոկելու է իր ուզած ճանապարհով, իր ուզած երթուղով Մեղրու միջանցքը: Դրանից հետո Ադրբեջանը կհանգստանա՞, թե՞ չէ: Սա նույն տրամաբանությունն է, որ ասում էիք՝ Արցախը տանք, պրծնենք, որ հանգիստ ապրենք: Հիմա դիմում եմ վարդենիսցի տիկին Մանյային, որ ասում էր՝ լավ է, իմ տղան Վարդենիսում է ծառայում, նրան վտանգ չի սպառնում»,-«Հայելի» ակումբում՝ անդրադառնալով այս գիշեր Հայաստանի արեւելյան սահմանների գրեթե ամբողջ երկայնքով Ադրբեջանի սանձազերծած պատերազմին, ասաց «Անվտանգություն եւ ժողովրդավարություն ՀԿ նախագահ Նաիրա Զոհրաբյանը:
«Այս պահին փակված է Ճակատեն-Կապան այլընտրանքային ճանապարհը: Այն ճանապարհը, որի ասֆալտի բանտիկը երկու օր առաջ բացեցին: Իսկ այսօր արդեն Ադրբեջանը թույլ չի տալիս, որ շտապ օգնության մեքենաները մոտենան եւ վիրավորներին ու զոհերին, Աստված անի, որ զոհերը քիչ լինեն, տեղափոխեն,– նաեւ ասաց տիկին Զոհրաբյանը եւ անդրադառնալով Նիկոլ Փաշինյանի ելույթին՝ հավելեց։–Նա պիտի մոտենա ԱԺ ամբիոնին եւ հրաժարական ներկայացնի, որովհետեւ ես ունեմ լեգիտիմ կասկածներ եւ լեգիտիմ իրավունք՝ մտածելու, որ այս պատերազմը հերթական պայմանավորված պատերազմն է Մեղրիի միջանցքը Ալիեւի ուզած կարճ ճանապարհով հանձնելու համար: Նա պետք է հենց այսօր հրաժարական ներկայացնի»:
Աշոտ ՀԱԿՈԲՅԱՆ
