«Այնքան եմ ափսոսում, չգիտեմ ինչ ձեւ խոսեմ: Բա ինչի՞ն եք դուք մասնակցում, ուզում եմ հասկանամ»,- ԱԺ-ում դիմելով ընդդիմությանը՝ ասաց ԱԺ նախագահ Ալեն Սիմոնյանը:
Ինչպես տեղեկացրել ենք, Ադրբեջանի ԶՈՒ ստորաբաժանումները ինտենսիվ կրակ են բացել հայկական դիրքերի ուղղությամբ: ԱԺ-ում հայտարարության նախագիծ են պատրաստել ադրբեջանական հարձակման վերաբերյալ, որը ներկայացրեց նախագծի համահեղինակ, ԱԺ պետաիրավական հարցերի հանձնաժողովի նախագահ Վլադիմիր Վարդանյանը: Ընդդիմությունը չի քվեարկելու հայտարարության նախագծին, քանի որ համաձայնության չեն եկել: «Հայաստան» խմբակցության քարտուղար Արծվիկ Մինասյանի գնահատմամբ՝ կիսատ-պռատ նախագիծ է:
Ալեն Սիմոնյանն իր ելույթում ասաց. «Ի՞նչ պիտի լինի, որ այս դահլիճում ձեր օրակարգը սպասարկվի: Հայաստանը գրավեն վերջնականապես, բոլորս մեռնենք, ի՞նչ պիտի լինի, որ դուք գաք դահլիճ: Ո՞րն է ձեր օրակարգը՝ անվտանգությունից դուրս, ուզում եմ հասկանամ: Կամ դուք խի՞ եք եկել, ուզում եմ էդ էլ հասկանամ: Ի՞նչ եք անում դուք այստեղ երկուսով (նկատի ունի Սեյրան Օհանյանին եւ Արծվիկ Մինասյանին,- Հ. Ջ.) Եկաք ասացիք՝ ժամանակ է պետք, ասեցինք՝ մի ժամ, երկու ժամ, երեք ժամ, տվեցինք, գնացիք այս թուղթը բերեցիք, ասում եք՝ մենք գնանք:
Ադրբեջանի մասին հայտարարություն ենք ընդունում, երրորդ կետով ներքաղաքական հարց եք լուծում, թե՝ «այսպես կոչված խաղաղության դարաշրջանի քաղաքականության սնանկությունը»: Ո՞ւմ է դա հետաքրքիր, հիմա մենք դրա մասի՞ն ենք խոսում: Ձեր սնանկության մասին 30 տասնամյակ կարելի է խոսել:
Կարդացեք նաև
4-րդ կետով էլ ասում եք Ադրբեջանի հետ բանակցություններից դուրս գանք: Լո՞ւրջ: Դո՞ւրս գանք: Բա ի՞նչ անենք դուրս գանք: Էլի երկու հոգով գնալու եք սահմա՞ն պահեք:
Վարչապետն եկել է ասում է՝ եկեք հարց տվեք, եկել է ներկայացնում է՝ 49 զոհ ունենք, այսքան վիրավոր, թե՝ մենք մեր օրակարգն ունենք: Մի՛ եկեք էլի դահլիճ, անկեղծ խնդրում եմ ձեզ: Որպես ԱԺ նախագահ չեմ խնդրում, որպես ՀՀ քաղաքացի եմ ասում: Որ գալիս եք, ո՞ւմ է պետք, նույնիսկ այս իրավիճակում դուք չեք կարողանում ՀՀ շահը սպասարկել: Այստեղ քաղաքական ոչ մի հարց չկա՝ քոչարյանական, սերժական, ՔՊ-ական համակրի հարց չի: Ի՞նչ պիտի լինի, որ դուք գաք: Մի՛ եկեք»:
Ադրբեջանի հարձակման վերաբերյալ ՀՀ ԱԺ-ի հայտարարության նախագիծը քվեարկության դրվեց, կողմ քվեարկեց 65 պատգամավոր, որոշումն ընդունվեց:
Հռիփսիմե ՋԵԲԵՋՅԱՆ
